Daxili siyasət

Ana səhifə

Daxili siyasət

“Beynəlxalq terrorizm: Qafqazda hədəfləri, məqsədləri və strategiyası” mövzusunda dəyirmi masa keçirilib

13 fevral 2008 11:49 (UTC +04:00)

Bakı. Ramil Məmmədov-APA. Sülh və Münaqişələrin Həlli Mərkəzi (SMHM) “Beynəlxalq terrorizm: Qafqazda hədəfləri, məqsədləri və strategiyası” mövzusunda dəyirmi masa keçirib. APA-nın məlumatına görə, mərkəzin sədri Elxan Mehdiyev bildirib ki, SSRİ dağıldıqdan sonra dünyada təhlükəsizliklə bağlı məsələdə ortaya əlavə problemlər çıxıb. ABŞ-da baş verən 11 sentyabr terror aktından sonra isə problemə yanaşma və onunla mübarizə metodu dəyişilib. Milli Təhlükəsizlik Nazirliyinin keçmiş əməkdaşı İlham İsmayıl isə deyib ki, müasir terrorizm 1960-1970-ci illərdən sonra dünya ictimaiyyətinin gündəmində olan mövzuya çevrilib. O, terrorizmi siyasi məqsədlərə çatmaq üçün qeyri-dövlət üsulu da adlandırıb. Qafqazda terrorun hədəfləri, məqsədləri və strategiyası haqda söz açan İ. İsmayıl Azərbaycanın digər respublikalarla müqayisədə daha çox risk altında olduğunu söyləyib: “Gürcüstan və Ermənistanla müqayisədə Azərbaycanın geosiyasi mövqeyi və enerji resursları bu fikrə gəlməyə əsas verir. Digər tərəfdən Azərbaycan artıq 100 ildən artıqdır erməni terrorizmi ilə mübarizə aparmaq məcburiyyətindədir”. O, Azərbaycanın dini terrorizmdən də sığortalanmadığını deyib. Müsavat Partiyası Məclisinin sədri Sülhəddin Əkbər Qafqazı Avrasiyanın siyasi düyün nöqtəsi adlandırıb: “Azərbaycan isə xristian və müsəlman cəmiyyətlərinin kəsişməsində yerləşən Qafqaz ölkəsidir. Bütün bu amillər Azərbaycanın beynəlxalq terrorun hədəfində olmasına şərait yaradır”. Dəyirmi masada çıxış edən "Şərq-Qərb" Araşdırmalar Mərkəzinin rəhbəri Ərəstun Orucov, hərbi ekspert Azad İsazadə və digər ekspertlər Azərbaycanın dünyada yeri, rolu və beynəlxalq terrorizmin əhatə dairəsi barədə fikir mübadiləsi aparıblar.