Daxili siyasət

Ana səhifə

Daxili siyasət

“Müxalifətçilik fəaliyyəti haqqında” qanun layihəsi müzakirə olunmaq üçün Müsavat və AXCP-yə göndərilib

14 fevral 2008 16:21 (UTC +04:00)

Bakı. Fərid Əkbərov-APA. “Müxalifətçilik fəaliyyəti haqqında” qanun layihəsi artıq hazırdır”. Bu açıqlamanı APA-ya millət vəkili, parlamentdə “Müsavat” deputat qrupunun üzvü Pənah Hüseyn verib. Onun sözlərinə görə, bu qanunda müxalifətçilik fəaliyyətinin formaları və növləri əks olunub: “Qanun layihəsində müxalifət partiyalarının qərargahla təmin edilmələri, onlara dövlət televiziya və radiosunda efir vaxtı ayrılması, eləcə də dövlət büdcəsindən maliyyələşən rəsmi qurumlarda müxalifət partiyalarının üzvləri üçün kvota ayrılması nəzərdə tutulur”. P. Hüseyn bildirib ki, qanun layihəsində müxalifətçi deputatların parlament fəaliyyəti ilə bağlı bir çox məsələlər, o cümlədən Milli Məclisin komissiyalarının rəhbərliyində təmsil olunmaq məsələsinə də yer verilib: “Dünyanın bir sıra inkişaf etmiş demokratik ölkələri müxalifət partiyalarının fəaliyyəti ilə bağlı ayrıca qanun qəbul ediblər. Bu qanunun Azərbaycanda da qəbul olunması demokratik inkişaf baxımından böyük əhəmiyyətə malikdir”. P. Hüseyn qanun layihəsini rəy bildirmək üçün Müsavat Partiyası və Azərbaycan Xalq Cəbhəsi Partiyasına göndərdiklərini söyləyib. O, “Müxalifətçilik fəaliyyəti haqqında” qanun layihəsini baxılması üçün sabah Milli Məclisə təqdim edəcəklərini bildirib.