Daxili siyasət

Ana səhifə

Daxili siyasət

Demokratik Seçki Mərkəzi mayın 12-də keçirəcəyi mitinqə digər partiyaları dəvət etməyin formasını hələ müəyyənləşdirməyib

19 aprel 2008 08:42 (UTC +04:00)

Bakı. Ramil Məmmədli - APA. “Demokratik Seçki Mərkəzi atəşkəs rejiminin ləğvi ilə bağlı mayın 12-də keçirəcəyi mitinqə digər müxalifət partiyalarını dəvət etməyin formasını hələ müəyyənləşdirməyib”. Klassik Xalq Cəbhəsi Partiyasının (KXCP) sədri Mirmahmud Mirəlioğlu APA-ya deyib ki, Demokratik Seçki Mərkəzinin (DSM) növbəti toplantısında bu məsələ müzakirə olunacaq və müxalifət düşərgəsində təmsil olunan partiyalara dəvətin forması müəyyənləşdiriləcək. “Bu, rəsmi müraciət ola bilər, amma qeyri-rəsmi danışıqların aparılması da mümkündür. Əvvəlcədən qərarımız olub ki, heç bir partiyanı kənarda qoymayaq, YAP üzvlərinə də əlahiddə müraciətimiz olacaq”. M. Mirəlioğlu mitinqdə iştirak etmək üçün müraciət ediləcək partiyaların cavabının müsbət olacağına ümid etdiyini də söyləyib: “Mitinqə qatılmaq istəməyənlər olsa belə, təşəbbüsümüzdən geri çəkilməyəcəyik”. KXCP sədri mitinqin keçirilməsinə icazə verilməyəcəyi təqdirdə, buna uyğun addım atacaqlarını da bildirib.
Qeyd edək ki, DSM-in martın 28-də keçirilən Sədrlər Şurasının toplantısında Dağlıq Qarabağ münaqişəsinin həlli istiqamətində aparılan danışıqların gedişindən narahatlıq bildirilib və mayın 12-də atəşkəs vəziyyətinin ləğvi ilə bağlı mitinqin keçirilməsinə dair qərar qəbul olunub.
DSM-də 9 partiya - Azadlıq, Milli Demokrat, Açıq Cəmiyyət, Təkamül, Yaşıllar, Böyük Azərbaycan, Böyük Quruluş, Bütöv Azərbaycan Xalq Cəbhəsi və Klassik Xalq Cəbhəsi partiyaları təmsil olunur.