Daxili siyasət

Ana səhifə

Daxili siyasət

“Azadlıq” bloku “beşlər”in təklifindən imtina edib

21 may 2008 14:21 (UTC +04:00)

Bakı. Elnur Məmmədli APA. “Müxalifət düşərgəsinin Seçki Məcəlləsinə əlavə və dəyişikliklərlə bağlı hakimiyyətin irəli sürdüyü layihəyə münasibəti təxminən eynidir. Ona görə də biz müxalifət partiyaları arasında görüş keçirilməsi və layihə ilə bağlı müzakirə aparılmasında maraqlıyıq”. Bunu APA-ya açıqlamasında Müsavat Partiyası Mərkəzi İcra Aparatının rəhbəri Arif Hacılı deyib. Onun sözlərinə görə, müzakirələr nəticəsində müxalifətin ortaq sənədi hazırlana bilər: “Müxalifət və beynəlxalq təşkilatlar bu dəyişiklikləri neqativ qiymətləndirir”. A. Hacılı bildirib ki, qanuna təklif olunan dəyişikliklər təbliğat imkanlarını məhdudlaşdırmaq cəhdidir və diqqəti seçki komissiyalarının tərkibinin dəyişdirilməsindən yayındırmağa xidmət edir.
“Azadlıq” bloku Sədrlər Şurasının üzvü, Vətəndaş və İnkişaf Partiyasının (VİP) sədri Əli Əliyev isə Müsavat Partiyasının da təmsil olunduğu “beşlər”dən Seçki Məcəlləsi ilə bağlı birgə müzakirə aparılması üçün təklif aldıqlarını, ancaq bu təklifi qəbul etmədiklərini açıqlayıb: “Bizim seçkilərlə bağlı mövqeyimiz qətiləşib, sadəcə, rəsmiləşməsi qalıb. Düşünürük ki, seçkilərə qatılmaq iddiasını ortaya qoyan partiyalar özləri bu məsələni müzakirə etməlidirlər”.