Daxili siyasət

Ana səhifə

Daxili siyasət

“Vətəndaş cəmiyyəti və hüquqi dövlət quruculuğunda yerli özünüidarəetmə orqanlarının rolu” mövzusunda seminar keçirilib

24 oktyabr 2019 13:09 (UTC +04:00)

Bu gün MDB PAA İştirakçısı Olan Dövlətlərdə Demokratiyanın, Parlamentarizmin İnkişafı və Vətəndaşların Seçki Hüquqlarına Riayət Olunmasının Monitorinqi Beynəlxalq İnstitutunun Bakı filialının təşkilatçılığı ilə “Vətəndaş cəmiyyəti və hüquqi dövlət quruculuğunda yerli özünüidarəetmə orqanlarının rolu” mövzusunda seminar keçirilib.

APA-nın məlumatına görə, tədbirdə çıxış edən Milli Məclisin Regional məsələlər komitəsinin sədri Arif Rəhimzadə Azərbaycanda bələdiyyələrin fəaliyyətindən danışıb.

A. Rəhimzadə deyib ki, Azərbaycanda bələdiyyələrin fiziki şəxslərdən əmlak, hüquqi şəxslərdən torpaq vergisi toplamaq hüququ var. Bələdiyyələrin əmlak və torpaq vergisi toplaması sahəsində problemlərlə üzləşdiyini, əhalinin əksəriyyətinin bu vergiləri vermədiyini qeyd edən Komitə sədri bu il ilk dəfə dövlət büdcəsindən bələdiyyələrə subvensiya ayrılacağını nəzərə çatdırıb. Onun sözlərinə görə, subsidiyadan fərqli olaraq subvensiyalar məqsədli layihələr üçün nəzərdə tutulmuş xərclərdir.

A. Rəhimzadə bu gün Ermənistanın Azərbaycan ərazilərinin 20 faizini işğal etməsi ilə əlaqədar yüz minlərlə insanın bələdiyyələrini formalaşdırmaq hüququndan istifadə edə bilmədiyini söyləyib.

Bələdiyyələrin vətəndaş cəmiyyəti və dövlət quruculuğunda rolundan danışan A. Rəhimzadə bu il bələdiyyə seçkilərinin keçiriləcəyini xatırladıb. Bir sıra kiçik bələdiyyələrin birləşdirildiyini, hazırda 1606 bələdiyyənin olduğunu nəzərə çatdıran A. Rəhimzadə bələdiyyə seçkilərində seçici fəallığının yüksək olacağına ümid etdiyini vurğulayıb: “İnanıram ki, vətəndaşlarımız bu il keçiriləcək bələdiyyə seçkilərində daha aktiv iştirak edəcək”.

Millət vəkili Tahir Rzayev Avropa Şurasının bələdiyyələrə müstəsna səlahiyyətlər verilməsi barədə fikirlərin səsləndirildiyini bildirib: “Müstəsna səlahiyyətlərin verilməsi dövlət içərisində dövlət yaratmaq demək olardı. Məsələn, Norveçdə bələdiyyələrlə əlaqədar böyük bir nazirlik fəaliyyət göstərir, bələdiyyələrin fəaliyyəti tənzimlənir. Digər tərəfdən, bələdiyyələr yerli əhəmiyyətli məsələlərlə məşğul olmalıdır. Bəzən deyirlər ki, bələdiyyələrin səlahiyyətləri dövlət orqanlarının səlahiyyətləri ilə üst-üstə düşür. Belə çıxır ki, nazirliklər ləğv olunmalı, bütün səlahiyyətlər bələdiyyələrə verilməlidir?! Bu, düzgün yanaşma deyil. Əsas məsələ odur ki, vətəndaşlarla bələdiyyələrin münasibətləri inkişaf etsin. Bu münasibətlər fonunda bələdiyyələrin fəaliyyətinin zəif olduğu barədə fikirlər səsləndirilir. Yaxşı olardı ki, gələcəkdə bələdiyyə sədrləri birbaşa əhali tərəfindən seçilsin. Bu, bələdiyyələrin fəaliyyətinin daha yüksək səviyyədə qurulmasına səbəb ola bilər. Azərbaycanda yaxşı fəaliyyət göstərən bələdiyyələr də var. Məsələn, keçən il 4 mindən çox layihə icra olunub. Ancaq bələdiyyələr bu sahədə fəaliyyətlərini təbliğ etmirlər. Biz istəyirik ki, seçkilərdə bələdiyyələrə daha təşəbbüskar insanlar seçilsin. Ona görə də qarşıdakı bələdiyyə seçkilərinin daha yüksək səviyyədə keçiriləcəyinə inanıram”.

Millət vəkili Azər Badamov, Kamran Bayramov, Pərvin Kərimzadə bələdiyyələrin fəaliyyəti və qarşıdan gələn bələdiyyə seçkiləri ilə bağlı fikirlərini bildiriblər.

MDB PAA İştirakçısı Olan Dövlətlərdə Demokratiyanın, Parlamentarizmin İnkişafı və Vətəndaşların Seçki Hüquqlarına Riayət Olunmasının Monitorinqi Beynəlxalq İnstitutunun direktoru vəzifəsini icra edən Yekaterina Qoloulina MDB ölkələrində bələdiyyələrin fəaliyyətindən, bu sahədə qanunvericilikdən danışıb.

Ədliyyə Nazirliyinin Bələdiyyələrlə İş Mərkəzinin rəisi vəzifəsini icra edən Rəhman Məmmədov deyib ki, bələdiyyələr artıq yerli özünüidarəetmə orqanı kimi özünü təsdiq etməkdədir: “2014-cü ildə keçirilmiş bələdiyyə seçkilərinin nəticələri də bunu təsdiq edir. Bələdiyyə üzvləri arasında ali təhsilli şəxslərin, qadınların və gənclərin sayı artmaqdadır. Bələdiyyələrin işinin qanuna uyğunluğunun təmin olunması üçün onların fəaliyyətinə dövlət tərəfindən inzibati nəzarət həyata keçirilir. Bu inzibati nəzarət Ədliyyə Nazirliyinin Bələdiyyələrlə İş Mərkəzi tərəfindən həyata keçirilir. Mərkəz hər il Milli Məclisə bu barədə məruzə təqdim edir. Eyni zamanda yerli özünüidarəetmə sahəsində Ədliyyə Nazirliyinə həvalə edilmiş digər mühüm vəzifə bələdiyyələrin fəaliyyətinin təşkilinə kömək və onlara metodoloji yardım göstərilməsi ilə bağlıdır. Ötən illər ərzində 1650-yə yaxın maarifçilik işləri həyata keçirilib, bu tədbirlərə 75 min bələdiyyə üzvü cəlb olunub. Bu illər ərzində bələdiyyələrin istifadəsi üçün 200-ə yaxın metodik vəsait hazırlanıb, 20 kitab çap edilib”.

Tədbir çıxışlarla davam edib.