Diaspor

Ana səhifə

Diaspor

DAK-ın həmsədri Firudin Pərvizniya: “Bizi daxili çəkişmələrə cəlb etməklə diqqəti Qarabağ və Güney Azərbaycan problemlərindən yayındırmaq istəyirlər”

25 iyun 2008 11:51 (UTC +04:00)

Bakı. Ramil Məmmədli APA. Bu gün Dünya Azərbaycanlıları Konqresinin (DAK) həmsədrləri Sabir Rüstəmxanlı və Firudin Pərvizniya mətbuat konfransı keçiriblər. APA-nın məlumatına görə, S. Rüstəmxanlı diqqəti iyunun 21-23-də Belçikanın paytaxtı Brüsseldə Qulamrza Səbri Təbrizinin rəhbərliyi ilə keçirilən qurultaya yönəldib. O bildirib ki, bəzi qüvvələr DAK-da parçalanma yaratmaq və Azərbaycan diasporunun fəaliyyətini zəiflətmək məqsədilə DAK-a alternativ təşkilat yaratmağa cəhd göstərirlər: “Demokratik DAK da, Qulamrza Səbri Təbrizinin rəhbərlik etdiyi qrup da DAK-dan ayrılanlardır. Onuncu qurultaydan öncə onları qurultayda iştirak etməyə çağırmışdım. Biz öz yolumuzla gedəcəyik və təşkilatdan ayrılan hər qrupla ayrı-ayrılıqda qurultay keçirmək niyyətimiz yoxdur”. F. Pərvizniya isə deyib ki, DAK-ı daxili çəkişmələrə cəlb etməklə diqqəti Qarabağ və Güney Azərbaycan problemlərindən yayındırmaq istəyirlər: “DAK-ın Qarabağla, Güney Azərbaycanla və digər problemlərimizlə bağlı komissiyaları yaradılacaq və qurumun bu istiqamətdəki fəaliyyəti əlaqələndiriləcək. DAK demokratik dəyərlərə əsaslanaraq həm Qarabağ, həm də Güney Azərbaycan problemlərinin BMT çərçivəsində ədalətli həllinə çalışacaq”. F. Pərvizniya DAK-ın fəaliyyətinin genişləndirməsi istiqamətində zəruri addımların atılacağını da söyləyib.