Ədəbiyyat

Ana səhifə

Ədəbiyyat

Laura Cəbrayıllının “Yeddinci qat” adlı ilk kitabının təqdimat mərasimi keçirilib - FOTOSESSİYA

Laura Cəbrayıllının “Yeddinci qat” adlı ilk kitabının təqdimat mərasimi keçirilib - <font color=red>FOTOSESSİYA</font>

04 mart 2010 10:17 (UTC +04:00)

Bakı. Ülkər Qasımova – APA. Bu gün “Etüd” Kitab Evində publisist–jurnalist Laura Cəbrayıllının “Yeddinci qat” adlı ilk kitabının təqdimat mərasimi keçirilib. APA-nın məlumatına görə, tədbiri açan Azərbaycan Yazıçılar Birliyinin (AYB) katibi, “525-ci qəzet”in baş redaktoru Rəşad Məcid kitabı ədəbiyyat nümunəsi adlandırıb: “Laura Cəbrayıllının qələmindən çıxan bütün yazılar hər zaman oxucular tərəfindən yüksək qiymətləndirilib. Bu kitab həqiqətən də ədəbiyyat nümunəsidir. Kitabda yer alan yazıların hər biri olduqca maraqlıdır. Kitabı ələ alan kimi Laura xanımın böyük zəhmət çəkdiyi məlum olur. Ona bundan sonra tez-tez bu cür təqdimatlar arzu edirik”.

Azərbaycan Milli Elmlər Akademiyasının müxbir üzvü, professor Rafiq Əliyev müəllifin güclü qələmə və intellektə sahib olduğunu bildirib: “Laura xanımın ictimai nüfuzu çox böyükdür. Əsil ziyalı bir insandır. Müsahibi danışdırmaq jurnalist üçün çox əhəmiyyətlidir. Kitabda mənim haqqımda olan yazı da dərc olunub və bu məni sevindirir”.

Tanınmış şair və kitabın ön söz müəllifi Vaqif Bayatlı müəllif və onun kitabı haqqında fikirlərini bölüşüb: “Laura bu kitabı təqdim etməklə, ciddi yazarlar, publisistlərə, əsasən də kişi yazarlarına əlcək atdı. O sübut etdi ki, türk qadını həqiqətən də çox güclüdür. Lauranın kitabı mənim kimi, çoxlarını ürəkdən sevindirəcək. Kitaba ön söz yazmaq üçün bütün yazıları oxudum və oxuduqca da zövq aldım. Mən Lauraya bu kitabı bizə bəxş etdiyi üçün təşəkkür edirəm”.

Təqdimat mərasimində şair-publisist Tofiq Abdin, Beynəlxalq Avrasiya Mətbuat Fondunun rəhbəri Umud Rəhimoğlu, aktyor Şamil Süleymanov, yazıçı Elçin Hüseynbəyli, “Azərbaycan” jurnalının baş redaktoru İntiqam Qasımzadə və başqaları müəllifi təbrik edib, yaradıcılığında uğurlar arzulayıblar.

“Yeddinci qat” kitabı “Avrasiya Press” nəşriyyatında çap olunub. Kitabın redaktoru Umud Rəhimoğlu, məsul redaktoru şair Qulu Ağsəsdir. Kitabda müəllifin esse, publisistika, müsahibə janrında yazıları yer alıb.