Ədəbiyyat

Ana səhifə

Ədəbiyyat

Milli Kitabxanada yazıçı-dramaturq Xalidə Hasilovanın anadan olmasının 90 illiyinə həsr olunmuş yubiley tədbiri keçirilib - FOTO

Milli Kitabxanada yazıçı-dramaturq Xalidə Hasilovanın anadan olmasının 90 illiyinə həsr olunmuş yubiley tədbiri keçirilib - <font color=red>FOTO</font>

16 dekabr 2010 10:57 (UTC +04:00)

Bakı. Ülkər Qasımova – APA. Bu gün M.F.Axundov adına Milli Kitabxanada yazıçı-dramaturq Xalidə Hasilovanın anadan olmasının 90 illiyinə həsr olunmuş yubiley tədbiri keçirilib. APA-nın məlumatına görə, Mədəniyyət və Turizm Nazirliyinin təşkilatçılığı ilə keçirilən tədbir çərçivəsində Milli kitabxananın Konfrans zalında X.Hasilovanın yaradıcılığına həsr olunmuş sərgi nümayiş olunub. Eyni zamanda tədbirdə çıxışlardan öncə “Heydər Əliyev və qadınlar” adlı qısa film nümayiş etdirilib. Milli Kitabxananın direktoru Kərim Tahirov Xalidə Hasilovanın Azərbaycanın qadın yazarları arasında özünəməxsus uğurlu yolu olduğunu deyib, onun müxtəlif illərdə “Azərbaycan qadını” jurnalında ədəbi işçi, “Göyərçin” jurnalının baş redaktoru, uzun illər isə “Azərbaycan qadını” jurnalının baş redaktoru kimi çalışmasından danışıb. Tədbirin aparıcılığını tanınmış jurnalist Flora Xəlilzadə həyata keçirib.

Yubiley tədbirində görkəmli ədiblər, jurnalistlər, yazıçını tanıyan mədəniyyət nümayəndələri çıxış edərək, uzun müddət “Azərbaycan qadını” jurnalının baş redaktoru olmuş X.Hasilovanın yaradıcılığından, tərcüməçi və jurnalist kimi fəaliyyətindən söz açıblar. X.Hasilova uzun müddət bədii yaradıcılıqla məşğul olub, həm uşaqlar, həm də böyüklər üçün bir sıra gözəl əsərlər yazıb. O, Azərbaycanın əməkdar mədəniyyət işçisi adını alıb, “Şərəf nişanı” və “Qırmızı Əmək Bayrağı” ordenləri ilə təltif edilib. Azərbaycanın görkəmli yazıçısı Xalidə Hasilova 1996-cı ilin dekabrın 5-də Bakıda vəfat edib.