Ədəbiyyat

Ana səhifə

Ədəbiyyat

“Natəvan” klubunda “2004-2010-cu illərdə Azərbaycan poeziyası” mövzusunda dəyirmi-masa keçirilib

02 mart 2011 13:38 (UTC +04:00)

Bakı. Ülkər Qasımova-APA. Bu gün Azərbaycan Yazıçılar Birliyinin (AYB) “Natəvan” klubunda “2004-2010-cu illərdə Azərbaycan poeziyası” mövzusunda dəyirmi-masa keçirilib. APA-nın məlumatına görə, mövzu ilə bağlı məruzəni “Ulduz” jurnalının redaktoru, şair Qulu Ağsəs təqdim edib. Məruzəçi bildirib ki, bu tipli tədbir qurultay öncəsi gənclərlə bağlı keçirilib: “Məruzəm əsasən orta və yaşlı nəslin yaradıcılığı haqqındadır. Burada bütün mətbu orqanlarını əhatə etməyə çalışmışam. Təkcə Azərbaycan Yazıçılar Birliyinin mətbu orqanlarında deyil, portallarda gedən yazılara da toxunmuşam”.

Qulu Ağsəs deyib ki, məruzəsində adları çəkilən yazarların bəzilərinin adlarının sadalamaqla keçib, lakin bəzilərinin üstündə dayanıb. Məruzəçi oxuduğu yazıları üç hissəyə bölüb: “Burada 50-60 adamın adını çəkmişəm, 20-si haqqında da danışmışam. Mən bu yazıları oxudum, həm əsəbiləşdim, həm sevindim, həm kədərləndim. Üç qisim şeirlərə rast gəldim – biabırçı, ortabab və əla şeirlərə. Sonda yenə sevindim, ona sevindim ki, çağdaş Azərbaycan şeiri bu gündə mənim ürəyimə dəyirs,ə deməli, burada sevinməli nə isə var. Çünki poeziyanın ən böyük məqsədi insan könlünə toxunmaqdır. Burada da mən ürəyimə toxunan yazılara rast gəldim. Azərbaycan poeziyası ölməyib”.

Tədbirdə AYB sədri, xalq yazıçısı Anar, xalq şairi Fikrət Qoca, “525-ci qəzet”in baş redaktoru Rəşad Məcid, Paşa Qəlbinur, Arif Əmrahoğlu və digərləri iştirak ediblər. Tədbir Qulu Ağsəsin Azərbaycan poeziyası ilə bağlı məruzəsinin müzakirəsi ilə davam etdirilib.