Ədəbiyyat

Ana səhifə

Ədəbiyyat

Millət vəkili Qənirə Paşayevanın “Tarixə adını yazan qadınlar” kitabının təqdimat mərasimi keçirilib - FOTOSESSİYA

Millət vəkili Qənirə Paşayevanın “Tarixə adını yazan qadınlar” kitabının təqdimat mərasimi keçirilib - <font color=red>FOTOSESSİYA</font>

07 mart 2011 11:38 (UTC +04:00)

APA-nın məlumatına görə, üç cildən ibarət olan kitabda ayrı-ayrı fəaliyyət sahələrində böyük işlər görmüş, “ilk”lərə imza atmış, tarixin müxtəlif dövrlərində yaşamış 100 məşhur qadının həyat və fəaliyyəti haqqında oçerklər toplanıb. Təqdimat mərasimində çıxış edən fəlsəfə elmləri doktoru Rəna Mirzəzadə bildirib ki, kitab Azərbaycanda gender elminin inkişafına mühüm töhfədir. Kitaba Azərbaycanın tarixində mühüm yer tutan üç azərbaycanlı qadının da adı daxil edilib. Bunlar Tomris, Sara Xatun və Azərbaycanın birinci xanımı Mehriban Əliyevadır.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova isə bildirib ki, qadınları güclü olmayan cəmiyyət zəif hesab olunur: “Azərbaycan qadınları çox yüksək pillələrə qalxmağa nail olan qadınlardır. Son illər cəmiyyətdə qadınların qərarların qəbul edilməsi prosesində rolu artıb”.

Azərbaycanın qadın hüquqlarının qorunması sahəsində inkişaf etmiş ölkələr sırasında olduğunu deyən kitabın müəllifi Qənirə Paşayeva isə bildirib ki, hələ də dünyanın bəzi ölkələrində qadınlar ən adi hüquqlardan belə məhrumdurlar: “Tarixə adını yazan qadınlar çox olub. Təəssüf ki, bəzən tarix onların adını lazımınca yazmayıb. Bu kitabı yazmaqda əsas məqsədim tarixə adlarını yazan, “ilk”lər yaradan qadınlarımızın həyatını, fəaliyyətini gənc qızlarımıza örnək kimi göstərmək olub. Bu kitab ən azı yüz qıza ünvanlanıb. Bu qadınların hekayətləri, çətinliklə əldə etdiyi uğurlar qızlarımızın hədəfə çatmaları üçün yardımçı olacaq. Amma kitab yalnız qızlarımıza ünvanlanmayıb. Kitab həm də atalar, qardaşlar, həyat yoldaşları və böyüməkdə olan gənc oğlanlar üçün yazılıb”.

BMT-nin Azərbaycandakı rezident əlaqələndiricisi Fikrət Akçura isə deyib ki, Azərbaycan qadın hüquqlarının qorunması sahəsində bir çox ölkələrdən öndə olsa da, əhalinin təxminən yarısını təşkil edən qadınların qərarların qəbul edilməsində rollarının daha da artırılması məqsədəuyğun olardı.

Qeyd edək ki, kitabda toplanmış materiallar Lent.az saytında silsilə şəkildə verilib.