Ədəbiyyat

Ana səhifə

Ədəbiyyat

İlyas Əfəndiyevin anadan olmasının 97-ci ildönümü ilə əlaqədar xatirə tədbiri keçirilib

23 may 2011 11:22 (UTC +04:00)

Bakı. Ülkər Qasımova – APA. Bu gün Azərbaycanın xalq yazıçısı İlyas Əfəndiyevin anadan olmasının 97-ci ildönümü ilə əlaqədar xatirə tədbiri keçirilib. APA-nın məlumatına görə, anım tədbiri İlyas Əfəndiyev adına Elitar Gimnaziyada baş tutub. Tədbir gimnaziya tərəfindən təşkil olunub. Tədbirdə çıxış edən Elitar Gimnaziyanın direktoru Sevda Quliyeva İlyas Əfəndiyev yaradıcılığından söz açıb və onun Azərbaycan ədəbiyyatındakı müstəsna xidmətlərindən danışıb. İlyas Əfəndiyevin xatirəsinə həsr olunmuş tədbirdə yazıçının nəvəsi Günay Əfəndiyeva, nəticəsi Aysu Əfəndiyeva da iştirak edib.

Tədbirdə çıxış edən Azərbaycanın xalq artistləri Mərahim Fərzəlibəyov, İlham Əsgərov, əməkdar artist Əjdər Həmidov, Akademik Milli Dram Teatrının ədəbi hissə müdiri Atababa Hacıbababəyov, Mədəniyyət və Turizm Nazirliyinin şöbə müdiri Vaqif Bəhmənli və başqaları İlyas Əfəndiyev yaradıcılığına nəzər salıb və onun həyatından danışıblar.

Akademik Milli Dram Teatrının aktyorlarının ifasında İlyas Əfəndiyevin “Hökmdar və qızı” tamaşası da nümayiş etdirilib. Eyni zamanda Elitar Gimnaziyanın şagirdlərinin ifasında İlyas Əfəndiyevə həsr olunmuş şeirlər səslənib. Çıxışlarda Günay Əfəndiyevanın müəllifi olduğu “Şeirə sığmayan ömür” adlı kitabdan da parçalar yer alıb.
Xatirə tədbirinin rejissoru əməkdar artist Loğman Kərimovdur.