Ədəbiyyat

Ana səhifə

Ədəbiyyat

Heydər Əliyev Fondu “Buta” sarayında kimsəsiz və valideyn himayəsindən məhrumuşaqlar üçün Yeni il şənlikləri keçirib

30 dekabr 2011 19:05 (UTC +04:00)

Bakı-APA. Bu gün Heydər Əliyev Fondu “Buta” sarayında uşaq evlərində və internat məktəblərində təlim-tərbiyə alan, kimsəsiz və valideyn himayəsindən məhrum, təhsildə xüsusilə fərqlənən uşaqlar üçün Yeni il şənlikləri keçirib.

APA-nın “Azərtac”a istinadən verdiyi xəbərə görə, Fondun prezidenti, Azərbaycanın birinci xanımı Mehriban Əliyeva və nəvələri, Heydər Əliyev Fondunun vitse-prezidenti Leyla Əliyeva növbəti bayram şənliyində iştirak ediblər.

Bayram şənliyi film nümayişi ilə başlayıb. Filmdə ümummilli lider Heydər Əliyevin müxtəlif illərdə Dünya Azərbaycanlılarının Həmrəyliyi Günü və Yeni il bayramlarında uşaqlarla bir yerdə olmasından və onlara qayğısından bəhs edilib.

Azərbaycanın birinci xanımı Mehriban Əliyeva tədbirdə iştirak edənləri salamlayaraq, hər kəsi bayram münasibətilə təbrik edib.
“2011-ci il ölkəmizin tarixində xüsusi yer tutacaq. Əziz uşaqlar, siz hamınız yəqin bilirsiniz ki, bu il Azərbaycan müstəqilliyinin bərpa olunmasının 20-ci ildönümünü qeyd edib. Bu 20 il ərzində ölkəmiz çox böyük nailiyyətlər əldə edib. Ölkəmiz bütün sahələrdə inkişaf edir, yeni proqramlar icra olunur, şəhərlərimiz gözəlləşir, yeni yollar, körpülər, məktəblər, xəstəxanalar, idman mərkəzləri tikilir. Ölkəmizdə bütün sahələrdə böyük inkişaf gedir. Bunu hamımız görürük. Hamımız fəxr edirik ki, biz belə bir qüdrətli və gözəl ölkədə - Azərbaycanda yaşayırıq”-deyə, M. Əliyeva bildirib.

Birinci xanım deyib ki, bu gün görülən işlər, aparılan quruculuq prosesi gələcək nəsillərin güclü, müstəqil, qüdrətli Azərbaycanda yaşamasını təmin etməkdir: “Ölkəmizin inkişafını siz davam etdirəcəksiniz. Buna görə də siz bu gün, ilk növbədə gözəl təhsil almalısınız. Çünki gələcək yalnız və yalnız təhsil, bilik, savad və ağılla bağlıdır. Mən bu bayram axşamı, əlbəttə, sizə ilk növbədə cansağlığı arzulamaq istəyirəm. İstəyirəm ki, siz yaxşı oxuyasınız, savadlı, bilikli olasınız. İstəyirəm ki, siz sabah müstəqil Azərbaycanın qurucuları olasınız. Əlbəttə, bugünkü nailiyyətlər hamımızı sevindirir. Bu gün hamımız fəxr edirik ki, belə bir gözəl ölkədə yaşayırıq”.

Uşaqlar Heydər Əliyev Fondunun prezidenti Mehriban Əliyevaya təşəkkürlərini bildirib, onunla və Heydər Əliyev Fondunun vitse-prezidenti Leyla Əliyeva ilə xatirə şəkli çəkdiriblər.

Şənlikdə iştirak edən hər bir uşağa Heydər Əliyev Fondunun bayram sovqatı, Yeni İlin rəmzi olan oyuncaq əjdahalar hədiyyə olunub.
Fondun Yeni il şənliklərində ümumilikdə 2 minə yaxın uşaq iştirak edib.