Ədəbiyyat

Ana səhifə

Ədəbiyyat

Hacıqabulda şəxsi kitabxanada 10 mindən çox nadir kitablar və əlyazmalar saxlanılır – FOTOSESSİYA

Hacıqabulda şəxsi kitabxanada 10 mindən çox nadir kitablar və əlyazmalar saxlanılır – <font color=red>FOTOSESSİYA </font>

27 aprel 2012 10:21 (UTC +04:00)

Hacıqabul. Əlibəy Zeynallı – APA. Azərbaycanın Hacıqabul rayonunda şəxsi kitabxanada 10 mindən çox nadir kitablar və əlyazmalar saxlanılır. Bu barədə APA-nın Mil-Muğan bürosuna kitabxananın yaradıcısı olmuş mərhum Hüseyn İsayevin oğlu Məhəmməd İsayev bildirib.

Hacıqabulda yaşamış mərhum ədəbiyyat müəllimi Hüseyn İsayevin şəxsi kitabxanasında (rayon mərkəzindəki fərdi evdə) 10 mindən çox kitab nüsxələri toplanıb. 1946-cı ildə yaradılan şəxsi kitabxanada nadir kitablar, əlyazmalar qorunub saxlanılır. Kitabxanada XIX əsrin əvvəllərindən sonlarına qədər Azərbaycanda baş vermiş əsas tarixi-ictimai hadisələrin şahidi olmuş, məşhur "Murad xan ", "Kərbəlayi" rədifli şerlərin müəllifi, əslən rayonunun Nəvahi kəndində anadan olmuş, satirik şair Mirzə Baxış Nadimin əlyazmasının əl ilə çıxarılmış surəti də saxlanılır. Bundan başqa, kitabxanada 19-cu əsrdə Fransada və çar Rusiyasında çap olunmuş kitablar, həmçinin basma qəlib üsulu ilə çap olunmuş nadir kitab nüsxələri də var. 66 il ərzində kitabxanaya 10 mindən çox kitab, jurnal və qəzet nüsxələri toplanılıb. Kitablar dünyanın müxtəlif dillərində, müxtəlif qrafikalarda elmi, bədii, texniki cəhətlərinə görə fərqlənir. Bu gün də bölgədən və elmi müəssisələrdən kitabxanaya müraciət edənlər var. Mərhum Hüseyn İsayevin oğlu Məhəmməd İsayev və onun ailə üzvləri atasının mədəni mirasını qoruyub saxlayır və kitabxanadakı kitabların sayını artırmaqda davam edirlər.