Ədəbiyyat

Ana səhifə

Ədəbiyyat

Tanınmış türk yazıçısı İskəndər Pala Azərbaycana gəlir

13 sentyabr 2012 06:52 (UTC +04:00)

APA-nın məlumatına görə, “Babildə ölüm, İstanbulda eşq”, “Şah və Sultan”, “OD” və bir çox başqa populyar romanların müəllifi yazıçı sentyabrın 16-dan 19-dək Bakıda səfərdə olacaq. “Azərbaycan Beynəlxalq Araşdırmalar İnstitutu” İctimai Birliyinin sədri, millət vəkili Qənirə Paşayevanın dəvəti və təşkilatçılığı ilə baş tutan səfər yazıçının Azərbaycana ilk gıəlişidir.

İ. Palanın “OD” romanının Azərbaycan dilinə uyğunlaşdırılaraq çapını həyata keçirən “Azərbaycan Beynəlxalq Araşdırmalar İnstitutu” İctimai Birliyi yazıçının səfəri ilə bağlı proqram tərtib edib. Yazıçı bir sıra mühüm görüşlər keçirəcək.

Ayın 17-də Odlar Yurdu Universitetində professor-müəllim heyəti və tələbələrlə görüşən türkiyəli yazıçıya bu universitetin “Fəxri doktoru” adı veriləcək.

Yazıçının Milli Məclis üzvü olan ədəbiyyat, mədəniyyət, elm xadimləri və habelə Azərbaycan-Türkiyə Parlamentlərarası Dostluq Qrupunun üzvləri ilə görüşü olacaq.

Rəşid Behbudov adına Dövlət Mahnı Teatrında isə “İskəndər Pala ilə ədəbi-fəlsəfi fikir gecəsi” keçiriləcək.

Ayın 18-də Azərbaycanda Atatürk Mərkəzinin müdiri, millət vəkili, Milli Məclisin Mədəniyyət Komitəsinin sədri, Azərbaycan-Türkiyə Parlamentlərarası Dostluq Qrupunun rəhbəri Nizami Cəfərovla görüş, Mərkəzdə “Ortaq Türk tarixi və kültürü: yeni dövrün çağırışları və yazarların, tarixçilərin, aydınların üzərinə düşən vəzifələr” mövzusunda konfransın keçirilməsi və bir neçə ictimai təşkilat tərəfindən İskəndər Palaya ödül təqdim edilməsi nəzərdə tutulub.

Həmin gün Azərbaycan Yazıçılar Birliyində yazıçılarla, ədəbi ictimaiyyətin nümayəndələri ilə görüşən yazıçının, ardından Baş nazirin müavini, Xalq yazıçısı Elçinlə görüşü və Əlyazmalar İnstitutunu ziyarət etməsi də nəzərdə tutulub.

Türkiyəli yazıçı Bakıda olduğu müddətdə İşərişəhər, Qobustan və Atəşgahı da ziyarət edəcək.

Qeyd edək ki, İ. Palanın aparıcı media orqanlarında çıxışı, jurnalistlər üçün brifinqi də nəzərdə tutulub.

Pala