Bakı. Aynur Əliyeva – APA-Economics. Azərbaycanda internet istifadəçilərinin öz domen adlarının avtomatik olaraq provayderlər arasında daşınması məsələsi texnoloji baxımdan artıq həll olunub. Müəyyən hüquqi bazanın formalaşması ilə bərabər bu sistem yaxın vaxtlarda istifadəyə veriləcək. «APA-Economics»in məlumatına görə, bunu rabitə və informasiya texnologiyaları naziri Əli Abbasov bildirib.
Nazir xatırladıb ki, hazırda Azərbaycanda 40-dan artıq internet provayder fəaliyyət göstərir: «Onlar arasında rəqabətin düzgün təşkili, istifadəçilərin sərbəst seçimi, bir sıra çətinliklərlə rastlaşmamaq üçün yaxın vaxtlarda onlayn qeydiyyat sistemi istifadəyə veriləcək. İstənilən istifadəçi provayderini onlayn rejimdə istənilən vaxt dəyişə biləcək».