İnfrastruktur

Heydər Əliyev Beynəlxalq Aeroportunda Azərbaycan Hava Məkanından İstifadə, Strategiya və İnkişaf üzrə Səmərəlilik Mərkəzinin (ASEC) rəsmi açılış mərasimi keçirilib.

“Azərbaycan Hava Yolları” QSC-nin (AZAL) mətbuat xidmətindən “APA-Economics”ə verilən məlumata görə, Fransanın “THALES” şirkəti üçün bu pilot layihənin ümumi dəyəri 7 mln. avrodur.

AZAL prezidenti Cahangir Əsgərov bildirib ki, Hava Məkanından İstifadənin Səmərəlilik Mərkəzində aeronaviqasiya məlumatlarının mübadiləsi sahəsində qabaqcıl təcrübə və ən son texnologiyalardan istifadə edilib.

“Bu, Brüsseldə yerləşən Avropa Hava Hərəkəti Axınının İdarəetmə Mərkəzi (Eurocontrol) və Sinqapurda yerləşən Hava Hərəkəti Axınının İdarəetmə Mərkəzi arasında hava hərəkəti axınlarının əsas planlaşdırma mərkəzidir. ASEC sayəsində Azərbaycan həm “Eurocontrol”un, həm də Asiyanın Hava Axınları Planlaşdırma Mərkəzinin strateji tərəfdaşı rolunu oynayacaq. Eyni mərkəzdən postsovet məkanında və Yaxın Şərq ölkələrində yoxdur”, - deyə C.Əsgərov vurğulayıb.

Fransanın Azərbaycandakı səfiri Orelia Buşez layihənin Azərbaycan və Fransa, eləcə də hər iki ölkənin şirkətləri arasındakı möhkəm tərəfdaşlığın göstəricisi olduğunu qeyd edib: “Mən burada həm texniki, həm də estetik parametrlər üzrə gördüklərimdən böyük məmnunluq duydum. Biz çox şadıq ki, belə mərkəzin yaradılmasında iştirak etmişik. Mərkəz vasitəsilə mühüm məlumatları almaq və onları idarəetmə də istifadə etmək mümkündür. Bu onu göstərir ki, Azərbaycan bu regionda nəqliyyat habı olmağa qadirdir və olacaq da. Fransanın Azərbaycandakı səfiri kimi deyə bilərəm ki, bu layihə qarşılıqlı münasibətlərimizin çox gözəl göstəricisidir".

“Thales International” şirkətinin birinci vitse-prezidenti Rafael Eskinazi isə “AZAL və “Thales Group”un artıq 20 ildən çoxdur ki, əməkdaşlıq etdiyini və strateji tərəfdaş olduqlarını vurğulayıb.

“Yeni mərkəzdə tətbiq olunan sistemlər hava axınlarının idarəolunması üzrə ən müasir texnologiyalara əsaslanır ki, bu da onu adi hava hərəkətinin idarəolunması sistemindən daha əhəmiyyətli edir. Bu, AZAL-ın Azərbaycan hava məkanında çox sayda uçuşları idarə etməyə hazır olduğunun göstəricisidir. Əminəm ki, biz birlikdə daha çox iddialı layihələr həyata keçirə biləcəyik", - deyə R.Eskinazi qeyd edib.

Hazırda Azərbaycan ərazisi üzərindən 90 mindən çox tranzit

uçuşlar yerinə yetirilir.

Daha sonra C.Əsgərov və R.Eskinazi arasında aparılan danışıqlarda Azərbaycanın mülki aviasiyası sahəsində AZAL və “Thales”in gələcək əməkdaşlığı müzakirə edilib. Danışıqların yekunlarına əsasən Azərbaycanda fransız şirkətinin məhsullarının istehsalı üçün AZAL və “Thales”in Azərbaycanda birgə müəssisənin yaradılmasının mümkünlüyünü nəzərdən keçirmək barədə razılıq əldə olunub.

Qeyd edək ki, mərkəz aşağıdakı funksiyaları həyata keçirir:

- regional səviyyədə marşrut şəbəkələrinin inkişafı;

- hava hərəkəti axınının və hava məkanının buraxılış qabiliyyətinin planlaşdırılması və idarəedilməsi;

- səmərəli sıxlıq və buraxılış qabiliyyətinin artırılması məqsədilə hava hərəkəti axınlarının istiqaməti üzrə “Eurocontrol” ilə koordinasiya;

- hava məkanından istifadə üzrə monitorinq, təhlil, statistik məlumatların və hesabatların hazırlanması;

- hava məkanının sıxlığının təhlili;

- hava hərəkəti axınının dəyişdirilməsinə vaxtında reaksiya məqsədilə hava məkanının modelləşdirməsi;

- Azərbaycanın hava məkanının potensial istifadəçiləri bazarının araşdırılması və onların cəlb edilməsi.