Futbol

Ana səhifə

Futbol

Kapitan Rəşad Sadıqov, yarımmüdafiəçilər Georgi Adamiya və Aleksandr Çertoqanov “Neftçi”dən qovulub

28 oktyabr 2008 16:27 (UTC +04:00)

“APA-Sport”un məlumatına görə, aparıcı futbolçular - kapitan Rəşad Sadıqov, yarımmüdafiəçilər Georgi Adamiya və Aleksandr Çertoqanov komandadan uzaqlaşdırılıb.

Məsələ ilə bağlı “APA-Sport”a açıqlama verən R. Sadıqov komandadan qovulduğunu təsdiqləyib: “Bu mənim üçün gözlənilməz oldu. Bir saat əvvəl baş məşqçi bizə dedi ki, komandaya lazım deyilsiniz. Səbəb kimi zəif oynamağımızı göstərdi”.

Uzun müddət çıxış etdiyi komandadan kənarlaşdırılan 26 yaşlı müdafiəçi bu addımı dünyada analoqu olmayan hal sayıb: “Dünyanın heç bir yerində mövsümün ortasında oyunçunu komandadan kənarlaşdırmırlar. Bunun üçün transfer dövrləri var. İndiki vəziyyətdə bir ay, ay yarım müddətində oyunçular necə məşq etməlidir? Bunu Gedenin də diqqətinə çatdırdım. O isə bizi məşqlərə buraxmayacağını bildirərək, əvəzedici heyətdə hazırlıq keçməyimizi təklif etdi. Əvəzedicilərlə məşq etməyi qəbahət saymıram. Lazım gəlsə beş gün, üç gün onlarla hazırlıq keçə bilərəm. Amma yığma oyunçularının uzun müddət əvəzedicilərlə bir yerdə olması, milli komandanın da ziyanınadır”.

R. Sadıqovun fikrincə, komandadan kənarlaşdırılması baş məşqçisi Hans-Yurgrn Gedenin öz qərarı deyil: “Ona yalvarası deyiləm ki? Özünə dedim ki, sənin beynini doldurublar. Ona son oyunlarla bağlı bir neçə sual verdim. Cavab verə bilməməyindən hər şey aydın olurdu. Çünki qərarı o verməmişdi. Sadəcə, klubun ətrafında olanlar onun beynini doldurublar”.

Qeyd edək ki, az öncə daha iki futbolçu – yarımmüdafiəçi Rəşad Sadiqovla müdafiəçi Elnur Abdullayev də komandadan qovulub. Digər iki futbolçu Ruslan Abbasovla türkiyəli legioner Levent Kartop isə artıq məşqlərə buraxılmır.