Futbol

Ana səhifə

Futbol

Rövnəq Abdullayev: “Rusiya – Azərbaycan oyununa proqnoz vermək çətindir”

04 fevral 2009 12:16 (UTC +04:00)

Bakı – APA. AFFA prezidenti Rövnəq Abdullayev Premyer Liqada mübarizə aparan klubların rəhbərləri ilə bugünkü görüşün ardından brifinq keçirib. Apasport.az saytının məlumatına görə, assosiasiya başçısı jurnalistlərin müxtəlif suallarını cavablandırıb.

- Klub rəhbərləri ilə görüş necə keçdi? Əsasən hansı məsələlər müzakirə olundu?
- Tədbir çox yaxşı keçdi. Bildiyiniz kimi, fevralın 14-də Premyer Liqanın ikinci dövrəsi başlanır. Klubların mövcud durumu, problemlər barədə müzakirələr aparıldı. Çempionatın yüksək səviyyədə keçirilməsi üçün nələrin lazım olması haqda fikirlər, arzular, istəklər dinlənildi. İclasda məqsəd konkret qərar çıxarmaq deyildi. Biz klubların ötən mövsüm hansı irəliləyişlər əldə etmələri, qarşılaşdıqları çətinliklər barədə fikir mübadiləsi apardıq. Həmçinin, bu il üzləşə biləcəkləri problem və onların aradan qaldırılması məsələsinə baxıldı. Bu görüş sayəsində AFFA və klublar arasında yeni dönəm yarandı. Milli komandanın çalışdırıcılarının klubların məşqlərinə qatılmaları, onlara məsləhət vermələri məsələsi həllini tapdı. Hesab edirik ki, müəyyən standartlar əldə etmək, yəni klublarda taktiki yox, fiziki hazırlığı yaxşılaşdırmaq məqsədilə yığmanın məşqçilərinin səy göstərmələrinin məqamı çatıb. Klubların fiziki hazırlığını dünya standartlarına uyğun təmin etməliyik. Tədbir zamanı klub rəhbərləri də bu addımı alqışladılar. Onlar da bizə kömək edəcəklərini bildirdilər. Nəticədə yığmanın düşərgəsinə gələn futbolçular fiziki cəhətdən hazırlıqlı olacaqlar. Bundan başqa, görüşdə çempionatın gedişi, hakimliklə bağlı məsələlərdən danışıldı. Çox sevinirəm ki, klub rəhbərləri ötən mövsümdə hakimliyi yüksək qiymətləndirdilər və bu sahədə böyük dönüş olduğunu bildirdilər. AFFA hakimliyi prioritet sahə sayır və bunun inkişafından ötrü əlindən gələni əsirgəmir.

- Növbəti mövsümdə də çempionatımızda legionerlərə limit qoyulmayacağı bildirilir.
- Elədir. Gələn mövsüm yeni sistemə keçəcəyik, Premyer Liqada 12 komanda oynayacaq. Növbəti çempionatda da əcnəbi futbolçulara sayına məhdudiyyət qoyulmayacaq. Yalnız yeni sistemi sınaqdan keçirdikdən sonra bu məsələyə baxmağın lazım olub-olmadığını müəyyənləşdirəcəyik. Ən əsası, legioner limiti qoymaq üçün möhkəm baza yaratmalıyıq. Buna görə isə uşaq futbol məktəblərində inkişafa nail olmalıyıq. Ölkəmizdə peşəkar futbolçuların sayını artırdıqdan sonra legioner limiti məsələsinə qayıdacağıq.

- Konkret hansısa klubun qarşısına futbol məktəblərinin inkişafı ilə bağlı şərt qoyuldumu?
- Belə şərtlər lap əvvəldən var. İclasda uşaq futbolunun inkişafı naminə lazımi məsələlərə yenə baxdıq. Bir sıra klublardakı böyük nəticələri müzakirə etdik. “Bakı”, “Neftçi”, “Xəzər-Lənkəran”, “İnter”in uşaq futbol məktəbləri mövcuddur. Artıq “Qəbələ” də bu işə qoşulub. Sevindirici haldır ki, regionlarda da uşaq futbol məktəbləri, akademiyalar yaradılması istəyi yaranıb. “Qəbələ” klubunda belə bir akademiya fəaliyyətə başlayıb. Regional Futbol Federasiyaları Qəbələdə yarışların keçirilməsi, uşaq futbolunun inkişafı məqsədilə böyük işlər görəcəklər. Biz bunu digər klublara da tövsiyə edirik.

- Maliyyə böhranı ilə əlaqədar legionerlərin üzvlük haqqını azaltmaqla, klublara güzəşt olunması nəzərdə tutulmur?
- Legioner limitini götürməklə, ilk növbədə Azərbaycana aşağı səviyyəli oyunçuların gətirilməsinin qarşısını almağa çalışmışıq. Eyni zamanda, Azərbaycan futbolçusunun transfer qiymətini də nəzərə almışıq. Bu məbləğin müəyyən həddən az olmasınmı istəyirik. Amma legionerlərə limit qoyulsa, yerli futbolçulara tələbat artacaq və yenə süni bahalaşma baş verəcək.

- AFFA 2009/10 mövsümündən etibarən hər bir klubun özünə aid stadionu olması tələbini irəli sürüb. Bu tələbin yerinə yetirilməsi nə dərəcədə realdır?
- Bu istiqamətdə işlər gedir. Ancaq bilirsiniz ki, dünyada maliyyə böhranı mövcuddur. Çox klublar stadion tikintisinə başlayıb. Bununla belə, “1 klub, 1 stadion” layihəsini 1 il təxirə salmağımız mümkündür.

- Yəqin ki, bu məsələ İcraiyyə Komitəsində müzakirə olunacaq?
- Yox, hələ müzakirə edilməyib. Bu, mənim şəxsi fikrimdir.

- Fevralın 1-də milli komandamızın Özbəkistanla yoldaşlıq görüşü 1:1 hesabı ilə başa çatdı. Nəticədən razı qaldınızmı?
- Nəticədən razıyam. Artıq yığmada yeni oyunçular özünü göstərməyə başlayıb. Futbolun inkişafı üçün yeni nəsil yetişib. Özbəkistanla matçda əsas oyunçulardan çox, cavan futbolçular meydançaya çıxmışdı.

- Yığmamız martın 28-də Moskvada dünya çempionatının seçmə mərhələsi çərçivəsində Rusiya ilə qarşılaşacaq. Rusiyalılarla görüş barədə proqnozunuz nədir?
- Bu oyuna proqnoz vermək çətindir.