Futbol

Ana səhifə

Futbol

Berti Foqtsun Azərbaycan milli komandasına baş məşqçi təyin olunmasından 1 il ötür

03 aprel 2009 11:41 (UTC +04:00)

Bakı – APA. Almaniyalı Berti Foqtsun Azərbaycan futbol yığmasının baş məşqçisi postunda göstərdiyi fəaliyyətin 1 ili tamam olub. Apasport.az saytının məlumatına görə, onunla müqavilə düz bir il öncə, 2008-ci il aprelin 3-də Almaniyanın Münhen şəhərində bağlanılıb. Bu razılaşmanın 2009-cu il dekabrın 31-dək qüvvədə olması nəzərdə tutulub.

AFFA rəhbərliyi Berti Foqtsu 400-dək namizəd arasından seçib. Həmin namizədlər arasında Ektor Kuper, Lui Van Qal, Jak Santini, Bora Milutinoviç, Artur Jorje, Jak Santini, Rudi Föller, Hörnst Köpkel, Filipp Trussye kimi məşhur mütəxəssislərin adları olub.

Foqts indiyədək ölkəmizdə işləyən ən titullu məşqçidir. O, hətta 2004-05-ci illərdə yığmamızı çalışdırmış braziliyalı dünya çempionu Karlos Alberto Torresdən də məşhurdur. Çünki Torresdən fərqli, almaniyalının titulları təkcə futbolçu karyerasında əldə etdiyi dünya çempionluğu (1974-cü ildə) ilə bitmir. Foqts həm də baş məşqçi qismində 13 il öncə Almaniya milli komandasına Avropa çempionu titulunu qazandırıb.

Bir il ərzində Foqts Azərbaycan yığmasını 12 rəsmi oyuna çıxarıb. Bunlardan 4-ü dünya çempionatının seçmə mərhələsində, 8-i isə yoldaşlıq görüşləri çərçivəsində baş tutub. Foqtslu milli komandamızın balansı mənfidir: 2 qələbə, 5 heç-heçə, 5 məğlubiyyət. Topların fərqi 8:12-dir. Həmçinin, milli komandamız son 1 ildə Avropanın iki klubu ilə qeyri-rəsmi matç keçirib və nəticə sevindirici olmayıb. Yığmamız “Slaviya”ya (Çexiya) 0:2, “Ayntraxt”a (Almaniya) isə 0:1 hesabı ilə uduzub.

Berti Foqts arxada qalan 1 il ərzində Azərbaycanda bir sıra yeniliklərlə yadda qalıb. İlk dəfə onun təşəbbüsü ilə futbolçularımız xüsusi aparatlar vasitəsilə fiziki testlərdən, eləcə də xaricdə tibbi müayinədən keçiblər. O, ölkəmizə gəldiyi ilk gündən cavanlaşdırma siyasəti apardığı üçün indi veteran futbolçularımızın əksəriyyəti milli komandadan kənarda qalıb. Məhz onun dövründə Azərbaycan yığması müdafiədə sabit oyun nümayiş etdirməyə başlayıb. Rusiya və “Slaviya” ilə görüşlər istisna olmaqla, milli komandamız hər oyunda qapısından ən pis halda 1 qol buraxıb. Böyükhesablı məğlubiyyət isə ümumiyyətlə qeydə alınmayıb.

Bununla yanaşı, xoşagəlməz məqamlar da mövcuddur. Yığmamız dünya çempionatının seçmə mərhələsində hələ də qol vura bilməyib. Təbii ki, belə “dişsiz”liyin səbəbi seçmə matçlarda Foqtsun əsasən müdafiəyə üstünlük verməsi ilə əlaqədardır. Güclü rəqiblərlə oyunda ələ düşən 1-2 əlverişli qol epizodunu reallaşdırmağa isə hələ də futbolçularımızın ustalığı çatmır. 63 yaşlı məşqçi bu istiqamətdə çox çalışır. O, oyunçuların həftədə məşq saatlarını 8-dən 15-ə qaldırılmasının vacibliyini dəfələrlə vurğulayıb. Son vaxtlar ayda 2-3 dəfə təşkil olunan təlim-məşq toplanışları elə bu məqsədlə həyata keçirilir. Fakt budur ki, Azərbaycan Rusiya ilə görüşə 3 müxtəlif şəhərdə - Bakı, Dubay və Frankfurtda hazırlaşmışdı. İndiyədək futbol tariximizdə bunun analoqu yoxdur.

Foqts yığmamızın uğur qazanacağının asan olmayacağını gizlətmir. Əksinə, o, milli komandamızın Avropa səviyyəsinə yüksəlməsi üçün 3-4 il vaxt lazım olduğunu dəfələrlə bildirib.

Foqtsun azərbaycanlı jurnalistlərlə münasibəti isə təəssüf ki, hələ də arzulanan səviyyəyədək inkişaf etməyib. Düzdür, bu baxımdan onda müsbətə doğru irəliləyiş nəzərə çarpır. Halbuki, baş məşqçiliyinin ilk dövrlərində o, mətbuat nümayəndələrinə laqeyd yanaşır, onların suallarını həvəssiz cavablayır, tez-tez mübahisəyə girişirdi. Yəqin ki, bu, almaniyalının əvvəl işlədiyi ölkədə - Nigeriyada media mənsubları ilə qalmaqalından irəli gəlirdi. Nigeriyada ona açıq-aşkar nifrət edirdilər. İndi isə Foqtsla bizim jurnalistlər arasındakı münasibət qismən yaxşılaşıb. Hər şeyin – həm Foqts-KİV münasibətlərinin ideallaşması, həm də milli komandamızın nailiyyətlər qazanmasından ötrü bəlkə də zamana ehtiyac var. Bəlkə də...

Berti Foqtsun rəhbərliyi altında milli komandamızın keçirdiyi rəsmi oyunlar:

Bosniya - Azərbaycan - 1:0
Andorra - Azərbaycan - 1:2
İslandiya - Azərbaycan - 1:1
İran - Azərbaycan - 1:0
Uels - Azərbaycan - 1:0
Azərbaycan - Lixtenşteyn - 0:0
Finlandiya - Azərbaycan - 1:0
Bəhreyn - Azərbaycan - 1:2
Azərbaycan - Albaniya - 1:1
Azərbaycan - Özbəkistan - 1:1
Küveyt - Azərbaycan - 1:1
Rusiya - Azərbaycan - 2:0