Futbol

Ana səhifə

Futbol

Dünya futbolunun əfsanəsi Bobbi Robson vəfat edib

31 iyul 2009 13:13 (UTC +04:00)

Bakı – APA. Dünya futbol tarixinin əfsanəvi simalarından biri, İngiltərə milli komandasının oyunçusu və baş məşqçisi olmuş Bobbi Robson 76 yaşında dünyasını dəyişib. APA-nın beynəlxalq xəbər agentliklərinə istinadən verdiyi məlumata görə, B. Robson xərçəng xəstəliyindən əziyyət çəkirdi.

B. Robson futbolçu karyerası boyunca ölkəsinin “Fulhem” və “Vest Bromviç” komandalarında oynayıb. 1968-ci ildə “Fulhem”in baş məşqçisi postuna gətirilərək məşqçi karyerasına başlayıb. 1969-1982-ci ildə “İpsviç Taun” komandasının baş məşqçisi olan B. Robson bu komandaya İngiltərə kubokunu və UEFA kubokunu qazandırıb. 1982-ci il dünya çempionatından sonra İngiltərə milli komandasının başına keçən məşhur mütəxəssis daha sonra Hollandiyanın “PSV Eyndhoven”, Portuqaliyanın “Sportinq” və “Porto”, İspaniyanın “Barselona” və son olaraq ölkəsinin “Nyukasl” komandalarını çalışdırıb. Hollandiya, Portuqaliya çempionluğu, Portuqaliya və İspaniya kuboklarını qazanıb. 1997-ci ildə “Barselona” onun rəhbərliyi ilə öz ölkələrinin kubokunu qazanmış Avropa komandalarının yarışının qalibi olub. B. Robsonun sonuncu iş yeri İrlandiya milli komandasında məsləhətçi vəzifəsi idi.