Futbol

Ana səhifə

Futbol

Berti Foqts: “Almanlara qarşı pis oynayıb, əvəzində 0:0 hesablı nəticə əldə etməyimiz yaxşı olar”

11 avqust 2009 09:56 (UTC +04:00)

“Burada özümü yaxşı hiss edirəm. Azərbaycanda çalışdığım dövrdə yaxşı dostlar qazanmışam. Ancaq təəssüf ki, Almaniya yığması özü ilə Bakıya yağış gətirib”. Apasport.az saytının məlumatına görə, bu sözləri futbol üzrə Azərbaycan milli komandasının baş məşqçisi Berti Foqts deyib.

Bu gün AFFA-nın inzibati binasında mətbuat konfransı keçirən 63 yaşlı mütəxəssis jurnalistləri azərbaycanca salamlayıb. Daha sonra Foqts sabah dünya çempionatının seçmə qrup mərhələsi çərçivəsində Almaniya yığmasına qarşı keçiriləcək oyun barədə fikirlərini bölüşüb: “Hava şəraitinin yağışlı olması bizi narahat edir. Ümid edirəm ki, sabaha qədər hava yaxşılaşacaq və 35 dərəcə isti olacaq”.

Matça ciddi yanaşdıqlarını bildirən çalışdırıcı vurğulayıb ki, sürpriz edəcəkləri istisna deyil: “Bakı” və “Qarabağ”ın avrokuboklarda çıxışına görə, Almaniya ilə matça yaxşı hazırlaşa bilmədik. Təbii ki, “Qarabağ” Avroliqada “Honka” səddini adladığı üçün sevinirik. Lakin unutmayaq ki, sabahkı rəqibimiz “Honka” deyil, Almaniya yığmasıdır. Əgər almanlar görüşə ciddi yanaşmasalar, zarafata salsalar, biz sürpriz edərik”.

O, heç-heçəyə ümid etdiyini gizlətməyib: “Almanların Bakıya əsas heyəti gətirəcəyini bilirdim. Açığı, çox təəssüflənirəm ki, onlar bizimlə qarşılaşmaya eksperiment kimi yanaşmırlar. Belə olsaydı, bundan yararlana bilərdik. Onlar bizim 3 oyunumuzu izləyib, təhlil ediblər. Almanlar gənc komandamızın nəyə qadir olduğunu gördüyündən əsas heyəti gətirir. Lakin onlara qarşı biz 11 nəfərlə oynamayacağıq. 11 futbolçumuzla yanaşı, 35 min azarkeş də bizimlə olacaq. Mən Almaniya ilə qarşılaşma haqqında danışarkən heç vaxt gözəl oyundan bəhs etməmişəm. Pis oynayıb yaxşı nəticə qazanmaq istəyirəm. Məsələn 0:0 hesablı oyun. Həm də axı bizim bir üstünlüyümüz var. Biz rəqibin bütün güclü cəhətlərini bilirik. Almaniyalılar isə bizim haqda bu qədər məlumatlı deyillər”.

Foqts almaniyalı jurnalistlərə məsləhət verməyi də zəruri sayıb: “Bakı çox gözəl şəhərdir. Siz jurnalistlərə də şəhəri gəzməyi məsləhət görürəm. Gedib komandanızın məşqini izləməkdənsə, Bakını gəzib-dolaşmağınız məsləhətdir. Buna peşman olmazsınız”.

Qeyd edək ki, Azərbaycan - Almaniya matçı sabah saat 21:00-da Tofiq Bəhramov adına Respublika stadionunda başlanacaq.