Futbol

Ana səhifə

Futbol

Ləvənt Tüzəmən: «Raykardın baş məşqçi qabiliyyətini göstərməyinin yeri «Fənərbaxça» derbisidir»

27 mart 2010 22:25 (UTC +04:00)

İstanbul. Mayis Əlizadə - APA. Türkiyənin tanınmış futbol şərhçisi, «Sabah» qəzetinin yazarı Ləvənt Tüzəmənin Qalatasaray-Fənərbaxça derbisi ərəfəsində APA-nın Türkiyə bürosuna müsahibə verib.

- Super liqadakı çempionluq marafonun ən önəmli matçı Ali Sami Yen stadionundakı Qalatasaray-Fənərbaxça derbisi olacaq. Matçla bağlı sizin proqnozunuz necədir?

- Bursasporun cümə günü xal itirməsindən sonra QS-FB derbisi çox böyük önəm qazandı. Qalatasaray futbolçularının öz ayaqlarına gələn bu fürsəti əldən qaçırmayacaqlarını və qalib gələcəklərini düşünürəm. Çünki çempionluq yarışında Bursaspor ağır zədə alandan sonra bu şansı ən yaxşı şəkildə dəyərləndirməsi lazım olan komanda Qalatasaraydır. Çünki Bursaspor ilə matçı var. Əgər o matça qədər xal itirməyib Bursasporu məğlub edərsə, lider ola bilər. Fənərbaxçanın isə Bursaspor ilə matçı olmadığına görə, Qalatasaraya qalib gəlsə belə, üstünlüyü ələ keçirməsi çətin görünür. Bu durumda Beşiktaş da Eskişehiri məğlub edərək yarışa ortaq olmaq istəyəcəkdir. Beşiktaşın son həftədə Bursa ilə matçı olsa da, o uzaq bir ehtimaldır. O vaxta qədər liqadakı durumun formalaşacağına inanıram. Ona görə də çempionluq yarışında ən şanslı komandanın Qalatasaray olduğunu düşünürəm. Uzun müddətdən bəri Qalatasarayın Ali Sami Yendə üstünlüyü var. Orada Qalatasaray tamaşaçıların dəstəyi ilə daha fərqli oynayır. Əgər Qalatasarayın azarkeşləri gərgin atmosfer yaratmayıb komandalarını dəstəkləyərlərsə və futbolçular əsəbiləşməzsə, Qalatasarayın bu matçda qalib gələcəyinə inanıram.

- Komanda Trabzonda 30-cu dəqiqədə qapısında qol gördü. Ancaq ondan sonrakı 60 dəqiqədə qol vura bilmədi. Sizcə, bu, Qalatasaray üçün böyük bir problem deyilmi?

- Bu matçda Ardanın oynamasının böyük üstünlük yaradacağını düşünürəm. Arda ilə Qalatasaray daha fərqli və güclü olur. Bundan əlavə, Baroşun da indi komanda ilə ahəngdar olduğunu düşünürəm. Baroş ən az 45 dəqiqə oynaya biləcək. Ona görə də Arda ilə oynayan Qalatasarayın Fənərbaxçaya qarşı təsirli futbol oynayacağına inanıram. Buna görə də Qalatasarayın qalibiyyətə daha yaxın olduğunu düşünürəm.

- Raykardla bağlı nə demək istərdiniz?

- Raykardın bir xarizması və karyeri var-bu doğrudur. Ancaq meydançada xarizma və karyer yox, bilgi oynayır. Bəzi vaxtlarda Raykard ehtiyat skamyadan klubu idarə etməkdə çətinlik çəkir. Oyunçu dəyişdirəndə səhv edir. Xüsusilə, rəqib meydançalarında matçı xilas edəcək olan həmlələrini heç görmədik. Qalatasaraydakı oyunçuların şəxsi bacarıqları çox vaxt qələbəni gətirdi. Ancaq həm Eskişehirdə, həm də Trabzonda Raykardın şəxsi anlamda səhv etdiyini gördük. Xüsusilə, Trabzondakı matçı bir oyunçu dəyişdirərək bitirmək son dərəcə xətalı idi. Məncə, Raykard rəqib meydançalarda formada olmur. Ali Sami Yendə isə futbolçular yaxşı oynadığına və azarkeşlər dəstək verdiyinə görə komanda uğur qazanır. Raykardın komanda üzərində çəkisi vardır. Ancaq oyunu oxuma məsələsində onun sıxıntıları olduğuna inanıram. Demək ki, bu suala cavab tapmalıyıq: məşqçi komandanı daşıyır, yoxsa komanda məşqçini daşıyır? Barselona komandanın məşqçini daşıdığını düşünürəm.