Futbol

Ana səhifə

Futbol

Hakan Şükür: «Qalatasaray»la «Fənərbaxça» çempionluq istəyirlərsə, bu derbidə qalib gəlmək məcburiyyətindədirlər

27 mart 2010 23:27 (UTC +04:00)

İstanbul. Mayis Əlizadə - APA. «Qalatasaray»ın 2000-ci ildə UEFA kubokunu alan əfsanəvi komandasının üzvləri prezident Adnan Polatın təşəbbüsü kluba üzv qəbul edilib. Hakan Şükür, Bülent Korkmaz, Hakan Ünsal, Ümit Davala və Arif Erdem konqresdə ilk dəfə səs vermək üçün «Qalatasaray» litseyinin binasında olublar. APA-nın Türkiyə təmsilçisi Qalatasaray-Fənərbaxça derbisi ilə bağlı olaraq Hakan Şükürün fikirlərini öyrənib.

- Dəfələrlə «Fənərbaxça»ya qarşı derbi oynadınız. Bu dəfəki derbini əvvəlkilərdən fərqləndirən xüsusiyyət varmı?

- Bursanın uduzmasından sonra derbi hər iki komanda üçün daha da önəmli oldu. Çempionluq istəyirlərsə, bu derbidə qalib gəlmək məcburiyyətindədirlər. Çox zövqlü və mübarizə əzmi yüksək olan bir oyun gözləyirəm. Hər iki komandanın özünə görə üstünlükləri var.

- «Üstünlüklər» deyəndə nəyi nəzərdə tutursunuz?

- «Fənərbaxça» daha rahat və sakit top oynaya bilir. Ancaq «Qalatasaray»ın hücum qüvvəsi yüksəkdir. Ancaq kağız üstündəki qüvvə heç nə ifadə etmir. İki tərəfin xüsusiyyətləri oyunun sönük keçməsinə də səbəb ola bilər. Oyundan heç gözləmədiyimiz nəticə də çıxa bilər.

- Raykard və Daumun nöqteyi-nəzərindən oyunu necə dəyərləndirirsiniz?

- Ulduzu çox olan komandaların bəzi vaxtlarda çətinlikləri də olur. Keçmişlə müqayisədə hər iki komanda uğursuz bir dönəmdən keçir. «Bursaspor»dan 5-6 xal geridə qalmaq, «Bursaspor»un uğuru bu iki böyük klubun yaxşı oynamadığını da göstərir. Güclü futbolçuları olan komandaları idarə etmək də çətindir. Raykard və Daumun bunu necə bacaracağını görəcəyik.