Futbol

Ana səhifə

Futbol

Sabah futbol üzrə XIX dünya çempionatı başlayır

10 iyun 2010 15:19 (UTC +04:00)

Apasport.az saytının məlumatına görə, son mundialların ənənəsinə uyğun olaraq açılış matçında təşkilatçı ölkənin milli komandası meydana çıxacaq.

Özbək hakim Rövşən İrmatovun start fiti ilə başlayacaq ilk oyunda CAR yığması oynadığı A qrupunun favoritlərindən sayılan Meksika ilə görüşəcək. Bu, komandalar arasında baş tutacaq 4-cü matç olacaq. İlk iki qarşılaşmada afrikalıları 4 qola qonaq edən “atsteklər” 1993-cü ildə 4:0, 7 il sonra isə 4:2 hesabı ilə qalib gəlmişdi. Dörd il əvvəl “Gold Cup”da keçirilən son dueldə isə cənublular 2:1 hesabına sevindilər.

Açılışı matçının iştirakçılarının baş məşqçiləri də əvvəllər üz-üzə gəliblər. Məşhur braziliyalı Karlos Alberto Parreyra hələ Birləşmiş Ərəb Əmirlikləri yığmasını çalışdırarkən, meksikalı həmkarı ilə görüşüb. “Atsteklər”in indiki çalışdırıcısı Xavyer Aqirre ərəblərlə 25 il əvvəlki yoldaşlıq oyununda (2:2) meydana futbolçu kimi çıxmışdı.

CAR və Meksika milliləri mundiala yüksək əhval-ruhiyyədə başlayacaq. Afrikalılar son 3 hazırlıq matçında qələbələri sıralayıb. O qədər də güclü olmayan Kolumbiya (2:1) və Qvatemala (5:0) ilə yanaşı, Danimarka da arxası üstə qoyuldu – 1:0. Meksikalılar isə 15 gün əvvəl Hollandiyaya uduzsa da (1:2), dünya çempionları İtaliya ilə oyunda (2:1) günahlarını yuya bildi. Bu iki qarşılaşma arasında isə Qambiya darmadağın olundu - 5:0.

Titullarına görə qrupun digər iki komandasını arxada qoyan Uruqvay və Fransa isə artıq 6-cı dəfə üz-üzə gələcək. Əvvəlki 5 görüşdə rəqiblər elə dünya çempionu adını qazandıqları qədər qələbəyə sevinib. Yəni 2 dəfə cənubi amerikalılar, 1 dəfə avropalılar zəfər çalıb. 1924-cü ildə Uruqvay yığması rəqibinin daşını daş üstdə qoymayıb – 5:1. 42 il sonra mundialın final mərhələsində də uduzun tərəf fransızlar olub – 1:2. CAR-dakı dueldən 44 il öncə baş tutan həmin matç Uruqvayın Fransa üzərində son qələbəsidir. 25 il əvvəl yoxlama oyununda qalib gələn (2:0) avropalılar 1966-cı ildən sonra rəqibindən qol da buraxmır. Belə ki, 2002-ci il dünya çempionatının final mərhələsində və iki il əvvəlki yoldaşlıq oyununda komandaların heç biri qol vura bilməyib. Sen-Deni şəhərində baş tutan son matç həm də Raymond Domeneklə Oskar Tabaresin ilk və yeganə qarşılaşması olub.

Keyptaunda üz-üzə gələn rəqiblər start oyununa fərqli durumda çıxacaqlar. Bu il vur-tut 2 sınaq matçı keçirən cənubi amerikalılar o qədər də zəif olmayan rəqiblərlə matçlarda gücünü göstərib. Onlar İsveçrə (3:1) və İsraillə (4:1) qarşılaşmalarda 7 qola sevinib. Domenekin komandası isə son 16 gündə 3 dəfə meydana çıxsa da, azarkeşlərini ümidləndirən nəticələrə imza atmayıb. Kosta-Rikanı çətinliklə məğlub edən (2:1) fransızlar ardıcıl 2 oyundur qələbəyə həsrətdir. Özü də onlar Tunis (1:1) və Çinlə (0:1) bacarmayıblar.

I tur
11 iyun
A qrupu

19:00. CAR – Meksika
Baş hakim: Rövşən İrmatov (Özbəkistan)
Yohannesburq. Sokker Siti stadionu

23:30. Uruqvay – Fransa
Baş hakim: Yuiçi Nişimura (Yaponiya)
Keyptaun. Qrin Point stadionu