Futbol

Ana səhifə

Futbol

Hollandiya, yoxsa İspaniya?

11 iyul 2010 11:33 (UTC +04:00)

Bakı-APA. Bu gün futbol üzrə dünya çempionatının final oyunu keçiriləcək. APA-nın məlumatına görə, Yohannesburqun 84.500 yerlik Soccer City stadionunda Hollandiya və İspaniya yığmaları dünyanın ən güclüsünü müəyyənləşdirmək üçün üz-üzə gələcəklər. Bu, Avropanı təmsil edən iki komandanın qitədən kənarda keçirilən dünya çempionatının finalında üz-üzə gəlməsinə dair ilk faktdır.

Yohannesburqda keçiriləcək final qarşılaşması Hollandiya yığması üçün dünya çempionatlarında oynadıqları sayca üçüncü final matçı olacaq. 1974 və 1978-ci illərdə finala qədər getməyi bacaran “narıncılar” hər iki finalda ev sahiblərinə - Almaniya və Argentinaya uduzaraq gümüş medalla kifayətləniblər. İspaniya milliəri isə 13 dəfə futbol üzrə dünya çempionatının final mərhələsinə qatılsalar da, ən yaxşı göstəricini 1950-ci il çempionatında əldə ediblər. O zaman ispanlar dünya dördüncüsü olublar.

Bu gün keçiriləcək final matçının başqa bir özəlliyi çempionatın ən çox qol vuran oyunçusunun məhz bu matçda müəyyən olunacağıdır. İspan David Vilya və holland Uesli Sneyder hərəyə 5 qol vurmaqla ən yaxşı qolçular siyahısına başçılıq edirlər. Alman Tomas Müller və uruqvaylı Dieqo Forlanın da hesabında 5 qol var, lakin onların öz qol hesablarını artırmaq imkanı artıq yoxdur.

Cənubi Afrika Respublikasında keçirilən dünya çempionatının ən yadda qalan məqamları sözsüz ki, milli nəfəsli musiqi aləti vuvuzela və səkkizayaqlı dəniz ilbizi Pauldur. Sonuncu öz populyarlığına görə, artıq dünyanın ən məşhur futbolçularından belə geri qalmır. Almaniya yığmasının çempionatın final mərhələsində keçirdiyi oyunların bütün nəticələrini əvvəlcədən “tapmağı” bacaran Paulun son proqnozu da düz çıxıb. İlbiz iki gün əvvəl üçüncü yer uğrunda keçirilən matçda Almaniyanın Uruqvay üzərində qələbə qazanacağını əvvəlcədən xəbər verə bilib. İlbiz Paulun final maçı ilə bağlı proqnozu da maraqlıdır. O, final matçında İspaniya millisinin qalib gələcəyinə “inanır”. Paulun bu uğurundan sonra heyvanların proqnozlarına maraq artıb. Malayziya paytaxtında yaşayan Mina Kutti ləqəbli uzunquyruq tutuquşu da artıq proqnozunu “açıqlayıb”. Mina Kuttiyə içərisində finalda oynayacaq Hollandiya və İspaniya millilərinin adları yazılmış iki qapalı zərf verilib. Tutuquşu xeyli tərəddüddən sonra İspaniya millisinin adı yazılmış zərfi dimdikləyib və bununla da ispanların dünya çempionu olacağı “rəsmiləşib”.

Bu axşam Bakı vaxtı ilə 23.30-da başlayacaq final matçını idarə edəcək hakimin adı isə bir neçə gün əvvəl açıqlanıb. Hollandiya-İspaniya finalını ingilis hakim Hovard Uebb idarə edəcək. Sabiq polis əməkdaşı olan Hovard Uebbə final matçını idarə etməkdə laynsmenlər Darren Kinn və Maykl Mullarki kömək edəcək.

Hovard Uebb dünya çempionatının final mərhələsində üç oyun idarə edib və oyunçuların heç birinə qırmızı vərəqə göstərməyib. Maraqlıdır ki, İspaniya yığması dünya çempionatında yeganə məğlubiyyəti qrupun açılış matçında məhz Uebbin idarə etdiyi İsveçrə ilə matçda alıblar. Britaniyalı hakimin idarə etdiyi digər oyun da sürprizlə nəticələnib. İtaliya-Slovakiya matçında qonaqlar məhz Uebbin sayəsində 3-2 qalib gələrək növbəti mərhələyə vəsiqə qazanıblar. Həmin matçda Hovard Uebb italyanların iki təmiz qolunu hesaba almayıb. Braziliyanın Çiliyə 3-0 hesabı ilə qalib gəldiyi matçın hakimi də məhz Hovard Uebb olub. Xatırladaq ki, Çempionlar Liqasında “İnter”lə “Bavariya” arasında keçirilən final matçını da bu hakim idarə etmişdi.