Futbol

Ana səhifə

Futbol

Azərbaycan UEFA reytinqində 24-cü nəticəyə malikdir

27 avqust 2010 09:33 (UTC +04:00)

Bakı – APA. Avropa Liqasının pley-off mərhələsinin cavab oyunları ilə təsnifat mərhələsi başa çatıb. Apasport.az saytının məlumatına görə, 16 ildir qitə kuboklarının əsas mərhələsində debüt etməyən Azərbaycan klubları bu dəfə də təsnifat mərhələlərini adlaya bilməyiblər. Ümumilikdə, qitə kuboklarında təmsil olunan 53 ölkədən yalnız 28-nin komandası Çempionlar Liqası və Avroliqanın qrup mərhələlərində mübarizəni davam etdirir. Azərbaycan isə “payıza çıxmayan” 25 ölkə arasındadır.

Qrup mərhələsi ərəfəsində UEFA-nın klub reytinqi də açıqlanıb. Pley-off mərhələsində məğlubiyyətləri sıralayan Ağdamın “Qarabağ” klubu ölkəmizin əmsalına xal əlavə edə bilmədi. Bu isə o deməkdir ki, Azərbaycan 2010/11 mövsümünü 2,000 xalla bitirdi.

Amma bu, qitədə 24-cü nəticədir. Polşa, Belçika və Şotlandiya ilə birlikdə 24-27-ci yerləri bölüşən Azərbaycan şəriklərindən fərqli, təmsilçilərini itirdiyindən mövqeyini pisləşdirə bilər. Çünki həmin 3 ölkə ilə yanaşı, bizdən az xal toplayan Rumıniya, Moldova, Çexiya və Norveç hələ çıxışını davam etdirən komandaya malikdir. Lakin bu 7 ölkənin hamısını qabağa buraxacağımız halda belə, mövsümü ən azı 31-ci pillədə bitirəcəyik. Bu ölkələr arasında sonuncu olan Moldova (1,125) yeganə təmsilçisi “Şerif”in hesabına üçüncü “onluq”da qalmağımıza mane olacağı inandırıcı görünmür.

Son 5 ilin əmsallarına əsasən, 6,165 xalı olan ölkəmiz elə pley-off mərhələsi ərəfəsində olduğu kimi 37-ci yerdə qaldı. Bu isə 2012/13 mövsümü üçün klubların bölüşdürülməsində nəzərə alınacaq. Azərbaycandan geridə olan 16 ölkənin də təmsilçilərinin hamısını itirməsi isə bu pilləni əldən verməyəcəyimizi göstərir.

Qeyd edək ki, klublarımızın mübarizəyə qoşulacağı yeni – 2011/12 mövsümündə ölkəmiz 38-ci pillədən başlayacaq. Çünki 2006/07 mövsümünün nəticələri silindikdən sonra əmsalımız 4,832 olacaq.