Futbol

Ana səhifə

Futbol

Ağasəlim Mircavadov: “İcazə versələr, biz də işləyərik” - MÜSAHİBƏ

Ağasəlim Mircavadov: “İcazə versələr, biz də işləyərik” - <font color=red>MÜSAHİBƏ</font>

15 dekabr 2010 10:23 (UTC +04:00)

- Ölkənin ən titullu məşqçisi artıq yarım ildir işsizdir. Bu baxımdan yenilik varmı?
- Hələlik bir şey yoxdur. Görək də, sağlıq olsun. İcazə versələr, biz də işləyərik.

- Nəyə görə icazə verilməlidir ki?
- Yerli məşqçiyə icazə lazımdır. Bizdə xarici məşqçilər və futbolçulara üstünlük verirlər.

- Sizcə, yerli məşqçilərin qarşısında niyə “qımızı işıq yanıb”?
- Nə bilim, deyə bilmərəm. Bunu yazdınız, yazmadınız, mənası da yoxdur. Ancaq Allahın köməyi ilə iş olacaq. Həmişə demişəm, deyəcəyəm də: futbolumuzu yerli məşqçilər qaldıracaq. İndiyədək ölkəmizə nə qədər məşqçi gəlib, buna etiraz etmirəm. Ancaq istədiyim odur ki, iz qoysunlar. Bununla yanaşı, əcnəbi çalışdırıcıların köməkçiləri yerli məşqçi olmalıdır. Əcnəbi gedəndən sonra onun işini yerlilər həyata keçirməlidir. Ancaq əfsuslar olsun ki, əcnəbi 3-4 nəfəri də özü ilə gətirir. Müqavilə bitən kimi də qayıdırlar. Onun əvəzinə gələn yerli məşqçi də işə sıfırdan başlayır. Əslində, belə olmamalıdır.

- Cari mövsümdə hansısa klubdan təklif almısınızmı? Bəlkə eləsi olub ki, iddianıza uyğun gəlmədiyi üçün qəbul etməmisiniz?
- Yox, belə şey olmayıb. Təklif almamışam, heç kim mənimlə maraqlanmayıb. Oyunlara çox getmirəm.

- Hazırda klublarımızı çalışdıran yerli məşqçilərdən Nazim Süleymanov, Arif Əsədov, Qurban Qurbanov rəhbərliyiniz altında oynayıb. Onlarla xarici məşqçilərin işini müqayisə edəndə, hansı qənaətə gəlirsiniz?
- Çox şadam ki, öz məşqçilərimiz çalışırlar, yaxşı da işləyirlər. Bilirsiniz, bir səhvlə məşqçinin bütün iş əmsalını da pozmaq olmaz. Məsələn, almaniyalı Vinfred Şafer “Bakı”ya çox iddialı gəlmişdi, yaxşı heyəti var. Ancaq “Bakı” yerli məşqçilərin vaxtında da yaxşı oynayırdı. Həmin vaxt komandada yerli futbolçular çox idi.

- “Bakı” hesabat turunda “Neftçi”yə qalib gəlməklə, lideri dəyişdi. Bu oyunu izlədinizmi?
- Bəli. Deyim ki, “Neftçi” həmin görüşdə çox zəif oynadı. “Bakı” isə əksinə, layiqli qələbə qazandı. Adamın üstündə Allah var, bunu qeyd etmək lazımdır. Bir şeyi də deyək ki, “Bakı”nın güclü oynamağında “Neftçi” zəif təsir bağışlamasının da təsiri oldu. Yəni, biri güclü oynayanda, digəri zəif olur.

- Son klubunuz “Xəzər Lənkəran” həmin turda liderliyə qayıtdı. Bunu necə qarşıladınız?
- Normal. Həmişə demişəm ki, “Xəzər Lənkəran” yarandığı vaxtdan iddialı olub, olacaq da. Baş məşqçi postunda əcnəbi və ya yerli olmasına baxmayaraq, bu komanda həmişə çempionluq uğrunda mübarizə aparacaq. Çünki “Xəzər Lənkəran”ın özülü belə qurulub və mən bunu alqışlayıram.

- 7 komanda “altılıq” uğrunda mübarizə aparır. Amma biri sonda kənarda qalacaq. II dövrənin sonu ilə bağlı proqnozunuz necədir?
- Mən proqnoz vermirəm. Onu deyə bilərəm ki, gərgin mübarizə olacaq. Bu il qalan son iki oyun çox vacibdir. Xüsusilə, “Bakı” üçün. Bu komanda “İnter”i qəbul edəcək, sonra “Qəbələ” ilə səfər oyununa çıxacaq. Deyərdim ki, “Bakı” üçün bu iki oyun ölüm-dirim savaşı olacaq. Hər ikisində qələbə çalsa, “altılığ”a düşməsi üçün böyük şans qazanacaq. Ancaq birində büdrəsə, işi çətinləşəcək. Bunlar onu göstərir ki, oyunlarda gərginlik var.

- Xaricdə futbolçuların transfer qiymətləri və məşqçilər təklif olanda bunu mətbuata açıqlayırlar. Ancaq bizdə bunlar gizli saxlanılır. Sizcə, niyə belədir?
- Təklif deyəndə ki, gərək reallaşsın sonra da açıqlansın.

- Təklif başqa, reallıq başqa...
- Heç vaxt özümü reklam etməmişəm. Bundan uzağam. 20 il öncə reklam olunmuşam.

- Bu, aydın məsələdir. Sadəcə, vətəndə boş qalmaqdansa, gedib xaricdə işləmək olar...
- Məndə xaricdə işləmək imkanı həmişə olub. Ancaq nəsə qismət olmayıb. O mənada ki, evdə ailə problemləri ilə əlaqədar. Xaricdə işləmək üçün gərək ailəni də aparasan. Aparmadınsa, bu iş deyil ki. Get-gəl, ora-bura qaçacaqsan, rahat işləyə bilməyəcəksən.

- Misal üçün, sizə Rusiyada yaşamaq çətin olar?
- Yox. Mən orda oxumuşam, normaldır. Ancaq indiki vaxtda nəvələr var, uşaqlar işləyirlər. Elə şeylər var ki, onu burda həll etmək lazımdır. Həmişə ailəmə, həyat yoldaşıma, nəvələrimə görə çalışmışam.

- Rusiyada hələ də sizi tanıyan, maraqlanan klub varmı?
- Ola bilər. Sadəcə, biri var maraqlanır, biri də var təklif edir, danışıq olur. Bunlar fərqli şeylərdir. Elə siz də mənimlə “Neftçi”də işlədiyim zaman “Birlik kuboku”na gedəndə Rusiyadakı jurnalistlərin mənimlə maraqlandığını gördünüz. Aydın məsələdir ki, köhnə məşqçilər məni yaxşı tanıyırlar. Allaha şükür, özünüz da bunun şahidi oldunuz. Misal üçün, hakimimiz Rüstəm Rəhimovu orada yaxşı tanıyırlar. Kim orda çalışıbsa, həmin mehribançılıq indiyə kimi qalıb.

- İndi qış fasiləsidir və təklifi reallaşdırmağın əsl vaxtıdır. Sonra gec olacaq, yaya qalacaq...
- Allah hamının ruzisini verir. Ancaq evdə oturub, Allahın ruzisini ümid etmək – bu da düzgün deyil.