Futbol

Ana səhifə

Futbol

Şahin Diniyev İranın yüksək liqa komandası ilə müqavilə bağlayıb

04 iyul 2011 09:51 (UTC +04:00)

Bu haqda apasport.az saytına Diniyevin özü məlumat verib. 45 yaşlı həmyerlimiz Tehranın “Rah-Ahan” komandasını çalışdıracağını bildirib: “Hazırda yoldayam, İrandan qayıdıram. Bir neçə günlük Tehranda oldum. Yeni komandam Tehran təmsilçisidir. Ötən mövsümü 15-ci yerdə bitirsə də, yüksək liqada yerini qoruyub. Klubu yeni sahibkarlar alıb. Onlar “Rah-Ahan”a tamam başqa, yüksək səviyyədə şərait yaradaraq, gələcəklə bağlı iddialıdırlar. Mən İran paytaxtına gedib, vəziyyətlə yerində tanış oldum, gördüklərim məni razı saldı. Biz müqavilə şərtlərini razılaşdırdıq, məsələni rəsmiləşdirmək qalır. Bununla hüquqşünaslar məşğul olur. İyulun 8-ə kimi məsələ rəsmiləşəcək. “Rah-Ahan”la 1 illik müqavilə imzalamışam”.

Diniyev təklifin onun üçün gözlənilməz olduğunu deyib: “Hər şey 2 gün ərzində həll olundu. Klubdan e-mail ünvanıma məktub gəldi, məni rəsmən İrana dəvət etdilər. Hesab edirəm ki, İran çempionatı Azərbaycan Premyer Liqasından qat-qat güclüdür. Üstəlik, ölkəni kənarda təmsil etmək böyük şərəfdir və mən bütün bunları nəzərə alaraq, qonşu ölkədə çalışmağa razılıq verdim”.

Millimizin sabiq çalışdırıcısı İrana uyğunlaşmaqdan daha çox başqa problemə toxunub: “Artıq iyulun 28-də İranda növbəti çempionat başlayır. Göründüyü kimi, vaxt azdır və bu üzdən çətin olacaq. Bunun öhdəsindən gəlməyə çalışacağıq. Klubun sahibkarları dəyişəndən sonra yığışmamışdılar, məni gözləyirdilər. Mən hazırlıq planını iranlılara vermişəm. İyulun 7-də axşam Tehrana qayıdıram. Ayın 8-dən 15-dək, 15-dən 22-dək Ərdəbildə hazırlıq keçəcəyik. “Rah-Ahan”ın əsasını yerli futbolçular təşkil edir, 2-3 legioner var. Ora azərbaycanlı futbolçu aparmaq hazırda planlarıma daxil deyil. Rəhbərlik növbəti mövsümdə qarşıma ilk onluğa düşmək vəzifəsini qoyub”.

Qeyd edək ki, son iş yeri də vətəndən kənarda olan Diniyev 2009-10-cu illərdə Rusiyanın “Terek” klubunda çalışaraq, əvvəlcə əvəzedicilərin baş, sonradan əsas komandanın məşqçisi olub. O, 2009-cu il mövsümünün son 5 oyununda - Vyaçeslav Qroznının istefasından sonra əsas komandada baş məşqçi vəzifəsini icra edib.