Futbol

Ana səhifə

Futbol

Azərbaycanın futbol üzrə 20-ci milli çempionatının püşkü atılıb

22 iyul 2011 15:39 (UTC +04:00)

Apasport.az saytının məlumatına görə, tədbir AFFA-nın inzibati binasında 17:00-da başlayıb. Premyer Liqanı və kuboku keçirən Peşəkar Futbol Liqası (PFL) klub nümayəndələrinin iştirakı ilə ilk turda cütləri müəyyənləşdiriblər və buna əsasən mövsümün təqvimi tərtib olunacaq.

Növbəti çempionatımızda da 12 komanda - “Neftçi”, “Xəzər Lənkəran”, “Qarabağ”, AZAL, “İnter”, “Bakı”, “Qəbələ”, “Kəpəz”, “Turan”, “Simurq”, “Rəvan” və “Sumqayıt Şəhər” oynayacaq. Son 2 komanda Premyer Liqamızın debütantıdır. “Rəvan” 2-ci yerin sahibi kimi Premyer Liqaya çıxıb. I divizionun çempionu kimi güclülər dəstəsinə vəsiqə qazanan “Abşeron” Premyer Liqada oynamaqdan imtina etdi və onu Sumqayıt təmsilçisi əvəzlədi. Premyer Liqada çıxışını davam etdirməyi məqsədəuyğun saymayan Salyanın “Muğan” klubunun I divizionda oynayacağı ilə bağlı PFL-ə rəsmi müraciətinə müsbət cavabladı. Bu zaman onun yerinə Zaqatalanın “Simurq” klubunun çıxış edəcəyinə qərar verildi. O, ötən mövsüm 11-ci yeri tutduğundan, I diviziona düşməli idi.

Avqustun 6-7-də keçiriləcək ilk turda aşağıdakı oyunlar keçiriləcək:

1. “Qəbələ” – “Bakı”
2. “Xəzər Lənkəran” – “Sumqayıt Şəhər”
3. “Neftçi” – “Qarabağ”
4. “Simurq” – AZAL
5. “İnter” – “Turan”
6. “Kəpəz” – “Rəvan”

Sözsüz ki, yubiley - sayca 20-ci milli çempinatımızın ilk turunun mərkəzi oyunu Tofiq Bəhramov adına Respublika stadionunda baş tutacaq. Bütün milli çempionatımızın iştirakçıları olan “Neftçi” ilə “Qarabağ” ardıcıl 2-ci mövsümdür ilk turda mərkəzi arenada görüşəcəklər. Mövsümlərarası fasilədə heyətini xeyli gücləndirərək, iddiasını artıran “Qəbələ” ilə “Bakı” arasında oyun da prinsipial olacaq və maraqla gözlənilir. Onu nəzərə alaq ki, bakılılar ötən mövsüm rəqibinin həm ilk “altılığ”a düşməsinə, həm də ölkə kubokunda yarımfinala yüksəlməsinə mane olub.

“Neftçi” ilə “Bakı” (Respublika stadionu), “İnter”lə “Rəvan” (“Şəfa” stadionu) ev oyunlarını eyni stadionda keçirməyi püşkdə nəzər alınıb. Belə ki, bu klubların nümayəndələri ilk olaraq səbətlərə yaxınlaşıb. “Neftçi” 1, “Bakı” 2, “İnter” 3, “Rəvan” 6 nömrəni çıxarıb. Nəticədə bu klubları biri evdə oynayanda digəri səfərdə çıxış edəcək və ona görə eyni stadionda çıxış edən komandaların matçları üst-üstə düşməyəcək.

Qeyd edək ki, sayca 20-ci, yəni yubiley milli çempionatımızın avqustun 6-da başlayacağı gözlənilir.