Biləsuvar. Ağəddin Babayev - APA. Bu gün Azərbaycanın Milli Qəhrəmanı Mübariz İbrahimovun dəfn olunduğu gündən dörd il keçir. APA-nın cənub bürosunun məlumatına görə, bu münasibətlə Biləsuvar Olimpiya İdman Kompleksində Müdafiə Nazirliyi (MN) və Biləsuvar Rayon İcra Hakimiyyətinin (RİH) birgə təşkilatçılığı ilə "Qəhrəmanlıq ənənələrini yasadaq!" devizi altında təntənəli tədbir keçirilib. Şəhid ailələrinin, Qarabağ müharibəsi veteranlarının, Çernobıl qəzası və Əfqanıstan müharibəsi əlillərinin, ictimaiyyət nümayəndələrinin, hərbi hissələrin əsgər və zabitlərinin qatıldıqları tədbirdə çıxış edən MN-in nümayəndəsi, polkovnik Abdulla Qurbani, Biləsuvar RİH-nin başçısı Mahir Quliyev, Milli Məclisin üzvü Xanhüseyn Kazımlı və digərləri son on ildə ordu quruculuğunda qazanılan uğurlardan söz açaraq, Mübariz İbrahimov kimi qəhrəmanlar nəslinin yetişdiyini diqqətə çatdırıblar. Bildirib ki, erməni qəsbkarlarına sarsıdıcı zərbə vuran Mübarizin cəsədi düşmənin ciddi-cəhdinə baxmayaraq Ali Baş Komandanın qətiyyəti ilə alınaraq, noyabrın 7-də böyük izdihamla Vətən torpağına tapşırılıb. Qeyd olunub ki, məhz Mübariz kimi qəhrəmanların ardıcılları sayəsində Azərbaycan bayrağı tez bir zamanda Şuşada, Xankəndində, digər işğal altında olan ərazilərdə dalğalanacaq.
Teatrlaşdırılmış ədəbi-bədii kompozisiyada Silahlı Qüvvələrin Mahnı və Rəqs Ansamblının, respublikanın tanınmış sənətçilərin ifasında qəhrəmanlıq və vətənpərvərlik mahnıları, şeirləri səsləndirilib. Daha sonra 120 biləsuvarlı şəhidin portreti canlandırılıb, Mübariz İbrahimovun qəhrəmanlıq yoluna bir daha nəzər salınıb.
Sonda Milli Qəhrəman Mübariz İbrahimovun atası Ağakərim İbrahimov çıxış edərək oğlunun xatirəsini əziz tutduğu üçün Azərbaycan xalqına minnətdarlığını bildirib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
