Hadisə

Ana səhifə

Hadisə

Naxçıvan MR-in Bakıdakı nümayəndəliyi Sədərək sakini İsmayıl Hüseynovun saxlanması ilə bağlı açıqlama yayıb

27 yanvar 2009 12:54 (UTC +04:00)

Bakı-APA. “Son vaxtlar bir sıra müxalifət qəzetlərində maraqlı dairələr, o cümlədən bəzi hüquq-müdafiə təşkilatları tərəfindən Naxçıvan Muxtar Respublikasının Sədərək rayonunun Heydərabad qəsəbə sakini İsmayıl Süleyman oğlu Hüseynovun hüquqlarının pozulması ilə bağlı yoxlanılmamış və əsassız materiallar dərc olunub. Bununla da ictimaiyyətə düzgün məlumatların verilməməsinə, adamların çaşdırılmasına cəhdlər göstərilib”.
Bu barədə APA-ya Naxçıvan Muxtar Respublikasının Bakıdakı Daimi Nümayəndəliyindən daxil olan açıqlamada bildirilib. Açıqlamada qeyd olunub ki, qərəzli və təxribat xarakteri daşıyan bu məlumatlar real vəziyyətlə üst-üstə düşmür: “Belə ki, İsmayıl Hüseynovun şikayətinin məzmunu əsassız olaraq qaldırılan mənzil iddiası ilə bağlıdır. 2008-ci ildə Naxçıvan Muxtar Respublikasında müharibə əlilləri, şəhid və qaçqın ailələri üçün 36, o cümlədən Sədərək rayonunda 4 dörd belə mənzil tikilib və müvafiq kateqoriyadan olan ailələrə paylanıb. Heç bir əsas olmadan bu mənzillərin bölgüsü zamanı narazılıq edən İsmayıl Hüseynov sayca üçüncü nikahda olduğu Hüseynova Laləzar Abo qızının bundan əvvəlki üçüncü nikahından əlil doğulmuş oğlu Həsənov Elvin Elman oğluna da ev verilməsi tələbini irəli sürüb. O, bununla bağlı Sədərək rayon İcra Hakimiyyətinə və digər orqanlara müraciət edib”.
Məlumata görə, qeyd olunan təşkilatlarda İ. Hüseynova şikayətinin əsassız olması, mənzillərin şəhid ailələrinə, müharibə əlillərinə verilməsi izah olunsa da o, bu il yanvarın 3-də Sədərək rayon İcra Hakimiyyətinin inzibati binasına gələrək İcra Hakimiyyəti başçısının iş otağına daxil olub, yenidən ev tələbi ilə bağlı səs-küy salaraq İcra Hakimiyyəti başçısını əlindəki ağacla vurub: “İsmayıl Hüseynov İnzibati Xətalar Məcəlləsinin 296-cı maddəsində nəzərdə tutulan inzibati xətanı törətdiyinə görə barəsində protokol tərtib edilib. Yanvarın 5-də Sədərək rayon Polis Şöbəsində İsmayıl Hüseynovun izahatı alınarkən o, özünü aqressiv aparıb. Danışarkən sözləri arasında əlaqələrin itməsi İsmayıl Hüseynovun psixi vəziyyəti barədə şübhə yaratdığından Sədərək rayon Mərkəzi Xəstəxanasından həkim dəvət olunub, baş həkim Nəriman Seyidovun 2009-cu il 5 yanvar tarixli 1/3 saylı göndəriş məktubu ilə o, psixi xəstəliyin olub-olmaması üçün Naxçıvan Muxtar Respublikası Psixi Xəstəliklər Dispanserinə göndərilib. Dispanserdə İsmayıl Hüseynova “yaşla əlaqədar psixopatik pozuntu” diaqnozu qoyulub. İsmayıl Hüseynov yanvarın 5-dən 12-dək Psixi Xəstəliklər Dispanserində müalicə olunub. Yanvarın 12-də İsmayıl Hüseynovun birinci həyat yoldaşından olan oğlu Fəxrəddin Hüseynovun ərizəsinə əsasən müalicəsinin davam etdirilməsi üçün Bakı şəhərinə aparılıb. Müalicə kursu keçən İsmayıl Hüseynov hal-hazırda Sədərək rayonunun Heydərabada qəsəbəsindəki evində yaşayır”.
Açıqlamada qeyd olunub ki, Naxçıvan MR-in Bakıdakı Daimi Nümayəndəliyi İ. Hüseynovla əlaqədar aparılan kampaniyanı qətiyyətlə pisləyir, bütün etika və əxlaqa uyğun olmadığını bəyan edir.