Hadisə

Ana səhifə

Hadisə

Nazirlər Kabineti Nəsimi rayonunda partlayış baş vermiş binanın 7 mənzilinin bərpa olunmasına qərar verib

30 yanvar 2009 11:33 (UTC +04:00)

Bakı. Hafiz Heydərov - APA. Azərbaycan Nazirlər Kabineti Nəsimi rayonu, Cavad xan küçəsi, 30 ünvanında yerləşən, partlayış baş vermiş beşmərtəbəli yaşayış binasının 4-cü blokunda yerləşən 7 mənzilin bərpa olunması barədə qərar verib. Bu barədə APA-ya Nəsimi rayon İcra Hakimiyyətindən bildirilib.

Qeyd olunan ünvanda partlayış baş verəndən sonra rayon Fövqəladə Hallar Komissiyası binanın 4-cü blokunda yerləşən 5 mənzilin (56, 57, 58, 59, 60-cı mənzillər) yararsız hala düşməsi və həmin mənzillərin bərpa olunmasına dair sənədləri Nazirlər Kabinetinə təqdim edib. Lakin Nazirlər Kabineti bu siyahıya 54 və 55-ci mənzilləri də əlavə edib. Qərarda bərpa olunacaq mənzillərin sakinlərinin yaşadıqları evlərin otaqlarının sayına uyğun kirayədə yerləşdirilməsi və bu məqsədlə onlara dövlət tərəfindən vəsaitin ayrılması qeyd olunub.

İcra Hakimiyyətindən, həmçinin, bildirilib ki, sakinlərin kirayədə yerləşdirilməsi məqsədilə onlara verilməsi nəzərdə tutulan vəsait bazar qiymətlərinə uyğun müəyyənləşdiriləcək. Sakinlərə dəymiş ziyanın məbləği açıqlanmasa da, NK-nın qərarında sakinlərə kompensasiyaların verilməsinin də əksini tapdığı bildirilir.

Qeyd edək ki, bu il yanvarın 16-da Bakının Nəsimi rayonu, Cavad xan küçəsi, 30 ünvanında yerləşən beşmərtəbəli yaşayış binasının 60-cı mənzilində qaz sızmasından partlayış baş verib. Hadisə nəticəsində 5 nəfər həlak olub, 10 nəfər isə yaralanıb.

Hadisə ilə əlaqədar dərhal Bakı Şəhər Prokurorluğu tərəfindən Cinayət Məcəlləsinin 314.2-ci (səhlənkarlıq, ağır nəticələrə səbəb olma) maddəsi ilə cinayət işi başlanılıb.

Partlayış baş verən, 60-cı mənzildə kirayədə yaşayan, Şirvan şəhər sakini, 1988-ci il təvəllüdlü Orxan Rəhim oğlu Əliyev yanvarın 17-də Nəsimi Rayon Polis İdarəsinin 19-cu Polis Bölməsi əməkdaşları tərəfindən şübhəli şəxs kimi saxlanılıb. Hadisənin onun günahı ucbatından baş verdiyi bildirilir. Onun barəsində Bakı şəhər Prokurorluğunda qaldırılmış cinayət işinin tərkibində Cinayət Məcəlləsinin 124.2-ci (ehtiyatsızlıqdan iki və daha çox adam öldürmə) və 187.3-cü (özgənin əmlakı ehtiyatsızlıqdan məhv etmə və ya zədələmə) maddələri ilə cinayət işi başlanılıb.

bina_partlayış