Hadisə

Ana səhifə

Hadisə

Daxili İşlər Nazirliyində ötən ilin yekunlarına həsr olunan Kollegiya iclası keçirilib

30 yanvar 2009 12:40 (UTC +04:00)

Bakı-APA. Bu gün Daxili İşlər Nazirliyində respublika daxili işlər orqanlarının ötən il cinayətkarlığa qarşı mübarizə, ictimai qayda və ictimai təhlükəsizliyin təmin edilməsi üzrə fəaliyyətinin yekunlarına və qarşıda duran vəzifələrə həsr olunan geniş Kollegiya iclası keçirilib.
DİN-in mətbuat xidmətindən APA-ya verilən məlumata görə, kollegiya iclasında daxili işlər naziri, general-polkovnik Ramil Usubov ilin yekunları ilə bağlı məruzə edib.
Ramil Usubov hesabat dövründə bütün subyektlər üzrə 21692 cinayətin qeydə alındığını, onların 96 faizinin, yəni 20799-nun daxili işlər və prokurorluq orqanlarının qanunla müəyyən edilmiş səlahiyyətləri çərçivəsində istintaqı və təhqiqatı aparılan hüquqazidd əməllər olduğunu bildirib.
Qeyd olunub ki, təsnifatına görə cinayətlərin 89 faizini (18533-nü) böyük ictimai təhlükə törətməyən və az ağır, yalnız 11 faizini (2266-nı) ağır və xüsusilə ağır növlər təşkil edib. Cinayətlərin strukturunda qəsdən adam öldürmələr və ona cəhdlər 12,6 faiz, qəsdən sağlamlığa ağır zərər vurmalar 8,5 faiz, zorlamalar 26,5 faiz, hədə-qorxu ilə tələb etmələr 18 faiz, avtonəqliyyat vasitələrinin oğurlanması 33,3 faiz, xuliqanlıqlar 3,8 faiz azalıb. Adamları girov götürmə cinayəti isə ümumiyyətlə, qeydə alınmayıb.
Bununla yanaşı, cinayətlərin ümumi sayında 15,1 faiz artım da qeydə alınıb ki, bu da əsasən 1398 böyük ictimai təhlükə törətməyən və 1014 az ağır cinayətlərin hesabına olub. Latent xarakterli ağır və xüsusilə ağır cinayətlərin aşkarlanması üzrə daxili işlər və prokurorluq orqanlarının məqsədyönlü şəkildə həyata keçirdikləri tədbirlər nəticəsində, narkotik vasitələrin qanunsuz dövriyyəsi, insan alveri və dələduzluqla əlaqədar 369 fakt çox, habelə ibtidai istintaq və xidməti yoxlamalar prosesində əlavə 174 cinayət müəyyən edilib açılıb (o cümlədən 20 qəsdən adam öldürmə, 9 quldurluq, 11 soyğunçuluq, 43 oğurluq və s.).
Nazir deyib ki, ötən il bütün subyektlər üzrə cinayətlərin açılması 82,2 faiz təşkil edib.
Bununla bərabər, şəxsiyyət əleyhinə olan cinayətlərin 97,7 faizi, banditizm cinayətlərinin isə hamısı açılıb.
Ötən il 200 cinayət, o cümlədən 15 qəsdən adam öldürmə və ona cəhd, 24 qəsdən sağlamlığa ağır zərər vurma, 13 quldurluq, 6 soyğunçuluq, 3 adam oğurluğu, 84 nəqliyyat vasitəsinin qaçırılması və sair faktlar üzrə cinayətlərin iştirakçıları dərhal yaxalanıb.
Müxtəlif cinayətlər törətdiklərinə görə respublika üzrə 14132 nəfər məhkəmə məsuliyyətinə cəlb edilib. İl ərzində yerli və dövlətlərarası axtarışda olan 2963, o cümlədən MDB və digər xarici ölkələrdə gizlənmiş 152 təqsirləndirilən şəxs müəyyən edilərək tutulub: “Mütəşəkkil cinayətkarlığa, habelə dayanaqlı cinayətkar qrup və dəstələrə qarşı aparılan mübarizə də məqsədyönlü və effektli olub. Nəticədə 23 qəsdən adam öldürmə və ona cəhd, 135 quldurluq və soyğunçuluq, 17 hədə-qorxu ilə tələb etmə və s. xüsusilə ağır cinayətlər törətmiş 769 nəfərdən ibarət 227 qrup, habelə 30 mütəşəkkil dəstə zərərsizləşdirilib”.
Bildirilib ki, qanunsuz saxlanılan 1433 silah və 170 minə yaxın patron götürülmüş, nəticədə odlu silahın tətbiqi ilə törədilən cinayətlərin sayı 28 faiz azalıb.
R. Usubov hesabat dövründə qanunsuz dövriyyədən 651 kiloqram narkotik vasitə çıxarıldığını, “Xaş-xaş - 2008” şərti adı altında keçirilən kompleks əməliyyat-profilaktik tədbirlər nəticəsində isə ümumi çəkisi 408 tona yaxın olan narkotik tərkibli bitkinin yaşıl kütlə halında məhv edildiyini bildirib.
Nazir insan alverinə qarşı mübarizə barədə danışaraq deyib ki, bu növ cinayətlərlə bağlı 2007-ci illə müqayisədə 39,2 faiz çox - 394 fakt aşkarlanaraq 312 nəfər məsuliyyətə cəlb olunub. Cinayətlərin qurbanı olan 78 şəxs müəyyən edilib, 101 nəfərdən ibarət 43 cinayətkar qrup zərərsizləşdirilib.
O da qeyd edilib ki, ötən il qeydə alınmış yol-nəqliyyat hadisələrinin sayı 4,4 , qəzalarda ölənlərin sayı 5,5, yaralananların sayı 5,8 faiz azalıb. Görülən tədbirlər nəticəsində 13660 avtomobil, avtoxuliqanlıq etdiyinə görə 955 sürücü aşkarlanaraq qanunla müəyyən edilən ölçülər götürülüb. Nazir bildirib ki, prezident seçkilərinə hazırlıq dövründə, səsvermə hüququna malik bütün vətəndaşlar, ümumilikdə isə 776 min nəfər şəxsiyyət vəsiqəsi və 300 minə yaxın şəxs ümumvətəndaş pasportu ilə təmin olunub.
Prezidentin İcra Aparatının Hüquq-mühafizə orqanları ilə iş şöbəsinin müdiri Fuad Ələsgərov çıxış edərək daxili işlər orqanlarının fəaliyyətini müsbət qiymətləndirib.
Müzakirələrdə Naxçıvan MR-in daxili işlər naziri Əhməd Əhmədov, Bakı Şəhər Baş Polis İdarəsinin rəisi Rafiq Abbasov, DİN-in Baş İstintaq və Təhqiqat İdarəsinin rəisi Sərvər Mehrəliyev, Baş Narkotiklərlə Mübarizə İdarəsinin rəisi Həzi Aslanov, Şəxsi Heyətlə İş İdarəsinin rəisi Mehman Mehmanov, Gəncə Şəhər Polis İdarəsinin rəisi Rasim Musayev, Sumqayıt Şəhər Polis İdarəsinin rəisi Mehdi Hümbətov və başqaları hesabat dövründə görülmüş işlər barədə danışıblar.