Hadisə

Ana səhifə

Hadisə

Radikal dini qruplaşma üzvlərinin məhkəməsində Qobustan həbsxanasının keçmiş rəis müavini ifadə verib

03 fevral 2009 10:19 (UTC +04:00)

Bakı. Ramil Məmmədli - APA. Bu gün Ağır Cinayətlərə Dair İşlər üzrə Hərbi Məhkəmədə Azərbaycan Ordusunun keçmiş zabiti Kamran Əsədovun və digər 19 nəfərin cinayət işi üzrə məhkəmə prosesi keçirilib.
APA-nın məlumatına görə, hakim İslam Neymanovun sədrliyi ilə keçirilən prosesdə şahid qismində Ədliyyə Nazirliyinin Müalicə Müəssisəsinin əməliyyat-rejim şöbəsinin rəisi Şahkişi Bağırov ifadə verib. 2007-ci ildə Qobustan həbsxanasında əməliyyat-rejim üzrə rəisi müavini kimi çalışdığını bildirən Ş. Bağırov təqsirləndirilən İlkin İsmayılovu tanıdığını deyib. O, İlkin İsmayılovla Kamran Əsədov arasında həbsxanada 2007-ci ildə keçirilən görüş və telefon danışıqları barəsində ona məlum olan məqamları açıqlayıb. Ş. Bağırov deyib ki, 2007-ci ildə İ. İsmayılovun saxlandığı kameradan mobil telefon tapılaraq götürülüb. Həmin telefonun sahibi olan məhbus isə cəzalandırılıb. O, təqsirləndirilən Kamran Əsədovla İlkin İsmayılovun Qobustan həbsxanasında keçirilən görüşündən isə məlumatsız olduğunu deyib.
Qobustan həbsxanasında nəzarətçi kimi işləyən Mübariz Zeynalov isə şahid qismində verdiyi ifadəsində K. Əsədovun adı çəkilən həbsxanada cəza çəkən Anar Nurlunun yanına gəlməsi barədə məsələyə aydınlıq gətirib. Onun sözlərinə görə, Kamran Əsədov Anar Nurlunun yanına gələndə özünü qohumu kimi təqdim edib, şəxsiyyət vəsiqəsini göstərib.
M. Zeynalov həbsxanada olan görüş prosedurları barədə də məhkəməyə məlumat verib və qeyd edib ki, adı çəkilən şəxslər arasında cinayət tərkibli söhbətin aparılması haqqında məlumatı yoxdur.
K. Əsədov şahidin ifadəsinə müdaxilə edərək deyib ki, İ. İsmayılovla görüş üçün həbsxanaya gedən zaman şəxsiyyət vəsiqəsini deyil, zabit vəsiqəsini təqdim edib, 10 kiloqrama yaxın ərzaq və digər əşyaları Anar Nurluya çatdırıb.
Kamran Əsədov deyib ki, həmin vaxt hərbi hissənin qanunsuz tərk edərək Bakıya gəlib.
Hakim İ. Neymanov bildirib ki, səbəb göstərərək şahid qismində ifadə vermək üçün prosesə gəlməyən şəxslərin ibtidai istintaqa verdikləri ifadələr məhkəmədə elan olunacaq.
Daha sonra İ. İsmayılov məhkəməyə və dövlət ittihamçısına müraciət edərək onunla bağlı qaldırılan cinayət işi ilə razı olmadığını açıqlayıb. Təqsirləndirilən şəxs deyib ki, K. Əsədovla cinayət törədilməsi barədə heç bir razılaşması olmayıb.
Prosesdə söz alan təqsirləndirilən Yaşar Məhərrəmov da dövlət ittihamçısına müraciət edərək ittiham aktının ona və qardaşı Şəhriyar Məhərrəmova aid olan hissəsinin dəyişdirilməsini istəyib. O, günahsız olduqlarını bildirib.
Proses günün ikinci yarısında davam etdiriləcək.
Qeyd edək ki, təqsirləndirilən şəxslər - Kamran Əsədov, Bəxtiyar Orucov, Fərid Cabbarov, Elşən Məmmədov, Kamran Babayev, Samir Mehbalıyev, Tərlan Kərimov, Edqar Əliyev, Ramil Kərimov, Şirvani Babayev, Samir Əliyev, Yaşar Məhərrəmov, Orxan Əlizadə, Hacıbala Hüseynov, Azər İbadov, Şəhriyar Məhərrəmov, Ramin Cəlilov, Rövşən Əbdüləliyev, İlkin İsmayılov və Vüqar Əliyev dini radikal qrupda birləşərək, hərbi mübarizəyə başlamağa cəhd etməkdə, Bakıdakı “LUKoyl” yanacaqdoldurma məntəqəsinə silahlı basqın etməkdə, ABŞ və Böyük Britaniyanın Azərbaycandakı səfirliklərinə qarşı terror aktı hazırlamaqda ittiham olunurlar.