Hadisə

Ana səhifə

Hadisə

Azərbaycanın şimal bölgəsində üç intihar hadisəsi qeydə alınıb

17 mart 2008 07:41 (UTC +04:00)

Xaçmaz-Qusar. Solmaz Mehdiyeva - APA. Azərbaycanın şimal bölgəsində üç intihar hadisəsi qeydə alınıb. APA-nın şimal bürosunun məlumatına görə, Xaçmaz rayonunun Yalama kənd sakini, 1984-cü il təvəllüdlü Ruqiyyə Malik qızı Yarməmmədova martın 14-də siçan zəhəri qəbul edib. Xaçmaz Mərkəzi Rayon Xəstəxanasına (MRX) çatdırılan R. Yarməmmədovanın həyatını xilas etmək mümkün olmayıb. O, martın 16-da xəstəxanada keçinib.
Xaçmaz rayonunun Çinartala kənd sakini, 1957-ci il təvəllüdlü Habil Ağaşıx oğlu Qaraşıxov yaşadığı evdə özünü asaraq öldürüb. Mərhumun ruhi xəstə olduğu bildirilir.
Daha bir intihar Qusarda baş verib. Qusar Rayon Polis Şöbəsindən APA-nın şimal bürosuna verilən məlumata görə, rayonun Şirvanovka kənd sakini, 1992-ci təvəllüdlü Eyvaz Aslan oğlu Dəmirov martın 16-da özünü yaşadığı evin qarşısındakı çardaqdan asaraq öldürüb. Hər üç intihar hadisəsi ilə əlaqədar Xaçmaz və Qusar rayon prokurorluqlarında Cinayət Məcəlləsinin 125-ci (intihar həddinə çatdırma) maddəsi ilə cinayət işi başlanıb.
Qeyd edək ki, ilin əvvəlindən indiyədək şimal bölgəsində 13 intihar hadisəsi baş verib. Xaçmazda 9, Qusarda 3, Dəvəçidə isə 1 nəfər özünü öldürüb.