Bakı. Xanım Nağıyeva - APA. “Artıq 12 ildir ki, Heydər Əliyev Sarayında konsert vermirəm. Buna baxmayaraq, mən istər Bakıda, istərsə də bölgələrdəki konsert və el məclislərində tamaşaçılarımla görüşə bilirəm”. APA-nın xəbərinə görə, bu sözləri xalq artisti Brilliant Dadaşova mayın 29-da Heydər Əliyev Sarayında keçiriləcək “Apar məni” adlı konsert proqramı ilə bağlı keçirdiyi mətbuat konfransında deyib.
Onun sözlərinə görə, budəfəki konsertə çox az müddətdə hazırlaşıb: “Əslində konserti sentyabr-oktyabr aylarına planlaşdırmışdıq. Ancaq konsertin təşkilatçısı “Fire land” production şirkəti ilə mayın 29-na qərarlaşdırdıq. Konsertə 15 gün qalmış hazırlaşmağa başlamışıq. Vaxt məhdudiyyəti olduğuna görə konsertdə çıxış edəcək 15-dən artıq musiqiçi ilə daha sıx çalışırıq”.
B.Dadaşova biletlərin də rahat şəkildə satıldığını qeyd edib: “Artıq 15 günə 1500 bilet satılıb. Mən “Facebook” dostlarıma və mediaya konsert biletlərini pulsuz verməyi qərara almışdım. Ancaq hələ o pulsuz biletlər mənə gəlib çatmayıb. Ona görə də “Facebook”a utana-utana girirəm”.
Konsertdə göstəriləcək şou-proqramla bağlı sualı cavablandıran B.Dadaşova konsertə yalnız yüksək səviyyədə musiqi olacağını söyləyib: “Mən tamaşaçılara möhtəşəm şou-proqram vəd etmirəm. Konsertdə yalnız yüksək səviyyədə musiqi olacaq. Düşünürəm ki, tamaşaçılarıma yalnız mənim səsim lazımdır”.
Konsertin təşkilatçısı “Fire land” production şirkəti, rejissoru isə Nigar Hacızadədir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
