İncəsənət

Ana səhifə

İncəsənət

Parisdə dünya şöhrətli fotoqraf Reza Deqatinin Azərbaycana həsr olunmuş kitablarının təqdimatı keçiriləcək

27 noyabr 2014 15:24 (UTC +04:00)

Bakı – APA. Noyabrın 28-də Parisdə Heydər Əliyev Fondunun təşkilatçılığı ilə dünya şöhrətli fotoqraf Reza Deqatinin Azərbaycana həsr etdiyi “Odun cazibəsi” (Elegance of Fire) və “Günahsızların qırğını” (The Massacre of İnnocents) kitablarının təqdimatı olacaq. Tədbir çərçivəsində müəllifin Azərbaycandan çəkdiyi fotolardan ibarət sərgi də açılacaq.

Heydər Əliyev Fondundan APA-ya verilən məlumata görə, Fondun dəstəyi ilə nəşr olunan “Odun cazibəsi” (Elegance of Fire) kitabına R. Deqatinin 1987-ci ildən başlayaraq Azərbaycana səfərləri zamanı çəkdiyi fotolar daxildir.

Fotolarda Azərbaycanın rayonları, ucqar kəndləri, sadə insanların həyat tərzi, adət-ənənələri və s. öz əksini tapıb. Müəllif eyni zamanda milli rəqslər, konsert, tamaşa, sərgi və digər tədbirlərdən çəkdiyi fotolarla Azərbaycan mədəniyyətinin mənzərəsini yaradıb. Təqdimat çərçivəsində açılacaq sərgi dekabrın 7-dək davam edəcək.

Fondun dəstəyi ilə işıq üzü görmüş “Günahsızların qırğını” (The Massacre of İnnocents) kitabında isə fotojurnalistin 1992-ci ildə Ermənistanın azərbaycanlılara qarşı törətdiyi Xocalı soyqırımı zamanı lentə aldığı görüntülər toplanıb. Qətlə yetirilən insanların, onların ailə üzvləri və qohumlarının acılarını, Xocalıdan didərgin düşmüş sakinləri, onların məskunlaşdığı yaşayış yerlərini, çətin və əziyyətli həyat tərzini əks etdirən fotolar oxuculara faciənin ağrısını çatdırır. Kitabda, həmçinin Xocalı soyqırımının dünyada tanınması məqsədilə müxtəlif ölkələrdə keçirilən tədbirlərdən, qaçqın və məcburi köçkünlər üçün şəhərcikdən fotolar da yer alıb.

R. Deqatinin “Talelərin qovuşması”, “Müharibə+Sülh”, “Ümid”, “Qəlbin pəncərəsi” kimi layihələri dünyada məşhurdur. O, ABŞ-ın Milli Coğrafiya Cəmiyyətinin (National Geographic Society) üzvü, bir çox nüfuzlu universitetlərin fəxri doktoru, Fransanın “Xidmətlərə görə” ordeninin laureatıdır.

Qeyd edək ki, tanınmış fotojurnalist Azərbaycana ilk dəfə 1987-ci ildə səfər edib. 1997-ci ildə isə bir neçə ay Azərbaycanda yaşayıb, ölkəni gəzərək sadə insanların gündəlik həyatını, məişətini, adət-ənənələrini lentə köçürüb. 2013-cü ildə Parisdə R. Deqatinin “Azərbaycan - tolerantlıq məkanı” sərgisi keçirilib. Açılış mərasimində Azərbaycanın birinci xanımı, Heydər Əliyev Fondunun prezidenti Mehriban Əliyeva iştirak edib. Sərgi, həmçinin Moskvada, İsrailin müxtəlif şəhərlərində, eləcə də BMT-nin mənzil qərargahında, Avropa Parlamentində nümayiş olunub.

R. Deqatinin Azərbaycana həsr olunmuş kitablarının noyabrın 28-də keçiriləcək təqdimat mərasimi artıq Fransa ictimaiyyətinin diqqətini cəlb edib. Ölkənin bir sıra media orqanlarında təqdim olunacaq kitablar və sərgi haqda məlumatlar dərc edilib.