İnfrastruktur

Ana səhifə

İnfrastruktur

«Azərenerji» ASC: 17 saylı poliklinika Nazirlər Kabinetinin qərarı ilə sökülür

24 noyabr 2008 12:02 (UTC +04:00)

Bu barədə «APA-Economics»ə «Azərenerji» ASC-dən məlumat verilib.
Bu ərazidə «Azərenerji» ASC-nın mərkəzi aparatı üçün yeni inzibati bina və ərazidə yerləşəcək hökumət strukturlarının binalarını elektrik enerjisi ilə təchiz edən yarımstansiya inşa olunacaq.
Səhmdar cəmiyyətindən bildirilib ki, Keşlə Maşınqayırma Zavoduna aid olan bu ərazi hökumətin qərarı ilə Dövlət Əmlakının İdarə Edilməsi üzrə Dövlət Komitəsi (DƏİEDK) tərəfindən «Azərenerji» üçün ayrılıb. Artıq ərazidə inşa ediləcək binanın inşaat pasportu da hazırdır. Poliklinikanın sökülməsinə gəlincə, «Azərenerji»dən bu işin DƏİEDK tərəfindən həyata keçirildiyi vurğulanıb: «Nazirlər Kabinetinin qərarına əsasən, Dövlət Komitəsi ərazini tikinti üçün bizə boş təhvil verməlidir».
DƏİEDK-in mətbuat xidmətinin rəhbəri Qulu Xəlilov isə «APA-Economics»ə 17 saylı poliklinikanın komitə tərəfindən sökülmədiyini bildirib: «Ərazi «Azərenerji»nindir və poliklinikanın sökülməsində biz iştirak etmirik».
Bakı Baş Səhiyyə İdarəsi 17 nömrəli tibbi sanitar hissənin (poliklinika) sökülməsi ilə bağlı araşdırma aparmaq üçün Nizami rayon Polis İdarəsinə müraciət edib. Bakı Baş Səhiyyə İdarəsinin rəisi Leyla Seyidbəyovanın «APA-Economics»ə verdiyi məlumata əsasən, hadisənin baş vermə səbəbi onlara hələ də məlum deyil. L.Seyidbəyovanın sözlərinə görə, həmin tibb müəssisəsinin bütün avadanlıqları sındırılıb, kondisionerləri isə oğurlanıb: «Tibb müəssisəsinin baş həkimi dünən saat 11:00 radələrində işə gələndə görüb ki, poliklinika dağınıq vəziyyətədir. Hadisə yəqin ki, həmin gecə olub. Ancaq bunun oğurluq və ya hər hansı digər səbəbdən baş verməsi haqda hələ heç bir fikir söyləyə bilmərəm».
Sındırılmış avadanlıqların işlək vəziyyətdə olduğunu söyləyən L.Seyidbəyova hazırda dəyən ziyanın hesablandığını bildirib.