İnfrastruktur

İnfrastruktur

Azərbaycan paytaxtının təkrar mənzil bazarında passivlik iki illik maksimuma çatıb

17 mart 2009 15:21 (UTC +04:00)

Bakı. Rəşad Süleymanov – APA-Economics. Cari ilin fevral ayında Bakı şəhərinin təkrar mənzil bazarında bağlanmış əqdlərin dinamikasında 3,9% azalma qeydə alınıb. Bu barədə «APA-Economics»ə «Əmlak Bazarı İştirakçıları» İctimai Birliyindən məlumat verilib.
Ay ərzində ümumi təklif portfelində köhnə mənzillərin payı yanvar ayına nisbətən xeyli azalıb. Köhnə mənzillərdən fərqli olaraq ümumi təklif üzrə artım müşahidə olunub. Təklifin artmasına əsasən bazara yeni tikililərin daxil olması səbəb olub. Belə ki, yeni tikililərin təkrar bazardakı payı yanvarla müqayisədə 4,4% artıb.
Köhnə tikililər üzrə demək olar ki, bütün layihələrdə təklif üzrə azalma qeydə alınıb. Nəticədə, təkrar bazarda yeni tikililərin ümumi təklif portfelindəki payı yanvar ayında olduğu kimi 60% olub.
Bazarda təklif 3% artıb və satışa təklif olunan mənzillərin sayı 4 856-ya çatıb. Ay ərzində paytaxtın bütün rayonları üzrə orta qiymət azalması baş verib. Bazarda mənzillərin 1 kv. m-nin orta qiymətindən (1 321 ABŞ dolları) aşağı olan mənzillər ümumi portfeldə daha çox paya, yəni 61,3%-ə malikdir. Mənzillərin orta otaq göstəricisi 2,47 (artım 0,5%), hər otağın orta satış qiyməti 52 321 ABŞ dolları (artım 2,8%), mənzilin orta qiyməti isə 125 234 (artım 0,4%) ABŞ dolları təşkil edib.
Aparılan araşdırmalar göstərir ki, 2009-cu ilin ötən iki ayı ərzində bazarın bu seqmenti üzrə qeydə alınan passivlik son iki ildə ən yüksək həddə çatıb. Əmlakın bu növü üzrə likvid dəyər azalıb, risk dərəcəsi isə artıb. Bu səbəbdən təkrar bazar üzrə ekspozisiya müddəti daha 4 gün artaraq 111 günə çatıb. Ekspozisiya müddətinin artması əmlakın gəlirlik əmsalında da müşahidə olunub (-2,9%). Buna baxmayaraq, əmlakın gəlirlik müddətində artım müşahidə olnub (3%).
Aparılan araşdırmalardan məlum olub ki, təkrar bazarda şəhər üzrə mənzillərin qiymət indeksində də ötən aydan fərqli olaraq azalma baş verib. Bazara təqdim olunan «yeni tiklilər»in təklif portfelində xüsusi çəkisi yenə də artmaqda davam edib. Bu dəyişiklik ilkin bazarda aktivliyin azalması, paralel olaraq yeni tikililərin təkrar bazara çox sürətlə inteqrasiyası ilə izah olunur. Bununla yanaşı, mənzillərin qiymətinin azalmasından narahat olan bəzi qruplar öz əmlaklarını bazardan çıxarırlar ki, bu da paralel olaraq yeni tikilililərin təkrar bazardakı ümumi portfeldəki çəkisini artırır.
Yeni tikililərin təkrar bazarda ümumi təklif portfelində həlledici mövqeyə qalxması nəticəsində artıq otaq sayına görə təklif portfelində də dəyişiklik qeydə alınıb. Bazarda 2 otaqlı mənzillər üzrə tələb və təklifin digər mənzilləri üstələmə tendensiyası artıq yeni tikililərin hesabına 3 otaqlı mənzillərlə əvəz olunub. Fevral ayında aparılan araşdırmalar təkrar bazarda da ilkin bazarda olduğu kimi 3 otaqlı mənzillərin ümumi portfeldəki payının (38,6%) 2 otaqlıları (34,5%) üstələdiyini üzə çıxarıb. Fevralda təkrar bazarda ümumi təklif portfelinə Yasamal rayonunun təklif portfelindəki payı ötən ayla müqayisədə daha 1,3% artıb (27,4%).
Fevral ayında otaqlar üzrə 2, 4, 5 otaqlı mənzillərin sayında azalma qeydə alınıb. Təklif üzrə ən çox azalma 4 otaqlılarda qeydə alınıb (3,5%), 2 və 5 otaqlı mənzillərdə isə (1,3 və 2,9%) təklif üzrə azalma müşahidə olunub, 1 və 3 otaqlı mənzillərin təklif üzrə payı müvafiq olaraq 4,7% və 4,2% artıb. Orta qiymət artımı isə yalnız 3 otaqlı mənzillərdə qeydə alınıb (5,3%).