İnfrastruktur

Ana səhifə

İnfrastruktur

Azərbaycanın vergilər naziri Fazil Məmmədov: «Bəzən gülünc dərəcədə aşağı icarə qiymətləri ilə rastlaşırıq»

22 noyabr 2011 14:45 (UTC +04:00)

Bu barədə «APA-Economics»ə vergilər naziri Fazil Məmmədov məlumat verib.

Nazirin sözlərinə görə, bu, ilkin hesablamalardır və bunların arasında doğrudan da qohum olan şəxslərin öz obyektini digərinə etibarnamə ilə verməsi halları da ola bilər: «Amma bunun qanunvericiliyə zidd olduğunu nəzərə alaraq, mənim əmrimlə buna aid qaydalara dəyişiklik edilib». Nazirin bildirib ki, bundan sonra kommersiya obyektlərini hətta yaxın qohumlar tərəfindən bir-birinə etibarnamə ilə verildiyi hallarda da icarə müqaviləsinin olması tələb ediləcək: «Etibarnamə ola bilər, amma onunla yanaşı icarə müqaviləsi də olmalıdır».

Vergi orqanları icarə qiymətlərinin süni surətdə azaldılmasının da qarşısını alacaq. F.Məmmədov hazırda bəzi müqavilələrdə icarə qiymətlərinin kəskin azaldıldığını bildirib: «Çox biabırçı müqavilələrlə qarşılaşırıq, çox ucuz, hətta gülünc məbləğdə icarə qiymətləri var».

Bunun qarşısını almaq üçün kommersiya obyektlərinin minimum icarə qiymətləri əsas tutulacaq: «İlkin hesablamalarımıza görə, hər kvadrat metr üçün aylıq icarə haqqı minimum 5 manatdan hesablanmalıdır». Obyektin harada yerləşməsindən asılı olaraq bu rəqəm müəyyən əmsallar vasitəsilə artıb-azala bilər. Nazir bildirib ki, bu əmsallar Nazirlər Kabinetinin digər sahələrə aid qərarlarından, məsələn dövlət əmlakının icarəyə verilməsi və ya yeni tikililərdən vergi tutulması ilə bağlı qərarlarından götürüləcək.

Gələcəkdə isə Vergilər Nazirliyi icarə haqlarından vergi tutulması məsələsində bazar qiymətlərinə əsaslanmaq niyyətindədir. Avropa ölkələrində belə vergilərin bazar qiymətlərindən tutulduğunu bildirən nazirin sözlərinə görə, hazırda bu məsələni hüquqşünaslar araşdırır və Nazirlik bununla bağlı təşəbbüs qaldırmaq niyyətindədir: «Vergi Məcəlləsinə görə, bəzi sahələrdə vergilərin hesablanmasında bazar qiymətləri tətbiq oluna bilər. İndi hüquqşünaslarla müzakirələr aparılır, qanunvericilik təşəbbüsünə ehtiyac olarsa, biz bunu edəcəyik».