İnfrastruktur

Ana səhifə

İnfrastruktur

Azərbaycanda regional İT mərkəzinin yaradılması təklif olunur

24 noyabr 2011 08:13 (UTC +04:00)

Bakı. Vahab Rzayev – APA-Economics. Azərbaycanın rabitə və informasiya texnologiyaları naziri Əli Abbasov Bakıda səfərdə olan BMT-nin Avropa İqtisadi Komissiyasının (United Nations Economic Commission for Europe - UNECE) icraçı baş katibi Yan Kubişlə görüşüb. Nazirlikdən «APA-Economics»ə verilən məlumata görə, nazir UNECE ilə Azərbaycan arasında yüksək əməkdaşlıq əlaqələrinin mövcud olduğunu diqqətə çatdırıb.

Görüşdə «İnnovasiyalar üzrə fəaliyyətin icmalı» layihəsi haqqında məlumat verən Y.Kubiş bildirib ki, bu layihədə UNECE və beynəlxalq ekspertlər müvafiq ölkələrlə araşdırmalar apararaq lazımi tövsiyələr verir. Y.Kubiş Azərbaycanda 2013-ci ildə belə pilot layihənin hazırlanmasının məqsədəuyğun olduğunu əlavə edib.

Görüş çərçivəsində əsas məqsədi region ölkələrinin inteqrasiyasının dəstəklənməsi və dünya iqtisadiyyatına qoşulmanın təşviq edilməsi, birgə səylərlə daha effektiv həll ediləcək prioritet məsələlərin maliyyələşdirilməsi olan BMT-nin SPECA (Special Programme for the Economies of Central Asia - Mərkəzi Asiya iqtisadiyyatları üzrə Xüsusi Proqram) proqramı çərçivəsində əməkdaşlıq barədə fikir mübadiləsi aparılıb. Bundan başqa, Komissiyanın «Dövlət-özəl tərəfdaşlığı» istiqamətində fəaliyyətə başlaması məsələsi də müzakirə olunub.

UNECE-nin üzv ölkələrində informasiya texnologiyaları üzrə yaradılan regional mərkəzlərin əhəmiyyətindən bəhs edən Y.Kubiş belə bir mərkəzin Azərbaycanda yaradılmasının faydalı olacağını qeyd edib.

Öz növbəsində Ə.Abbasov bu layihəni dəstəklədiyini və layihənin icrası istiqamətində həyata keçirilən bütün işlərə lazımi köməyin göstəriləcəyini vurğulayıb.