İnfrastruktur

Ana səhifə

İnfrastruktur

Bakıda Avropa İqtisadi Komissiyasının beynəlxalq konfransı keçiriləcək

24 noyabr 2011 08:52 (UTC +04:00)

Bakı. Əli Əhmədov - APA-Economics. “BakuTel-2011” 17-ci Beynəlxalq sərgi-konfransı çərçivəsində 24-25 noyabr tarixlərində Azərbaycan Rabitə və İnformasiya Texnologiyaları Nazirliyi və BMT-nin Avropa İqtisadi Komissiyasının (UNECE) birgə təşkilatçılığı ilə UNECE-nin “Biliklərə əsaslanan inkişaf və innovativ sahibkarlıq” mövzusunda beynəlxalq konfransı və BMT-nin Mərkəzi Asiya İqtisadiyyatları üzrə Xüsusi Proqramının (SPECA) “Biliklərə əsaslanan inkişaf” layihəsi üzrə İşçi Qrupunun 4-cü iclası keçiriləcək.

“APA-Economics”in məlumatına görə, “Biliklərə əsaslanan inkişaf və innovativ sahibkarlıq” mövzusunda keçiriləcək beynəlxalq konfransa informasiya və kommunikasiya texnologiyalarının innovativ inkişafda olan iqtisadiyyat müstəvisində sahibkarlıq, dövlət və özəl tərəfdaşlıq məsələləri müzakirə mövzusu olacaq.

Bu konfrans mövcud potensialın gücləndirilməsi və biliklərin bölüşdürülməsi komponentlərindən ibarət olmaqla qərar qəbuletmə səlahiyyətinə malik yüksək səviyyəli şəxslər və biznes liderləri arasında təcrübə mübadiləsinə imkan yaradacaq.

Konfrans çərçivəsində UNECE müvafiq infrastrukturun yaradılması da daxil olmaqla biliklərə əsaslanan inkişaf və innovativ sahibkarlığa dair strateji məsələləri irəli sürmək məqsədilə beynəlxalq ekspertləri səfərbər edəcək. Ekspertlər öz ölkələrinin təcrübələrini təqdim edəcək və bu təqdimatlar ümumi müzakirəyə çıxarılacaq.

Eyni zamanda UNECE və BMT-nin Asiya və Sakit Okean üzrə İqtisadi və Sosial Komissiyası (UNESCAP) ilə birlikdə SPECA çərçivəsində biliklərə əsaslanan layihə üzrə işçi qrupunun 4-cü sessiyası keçiriləcək. Sözügedən sessiya zamanı işçi qrupunun 2011-ci il üzrə həyata keçirilmiş fəaliyyət proqramının təhlili, həmçinin 2012-2013-cü illər üzrə iş proqramının qəbul edilməsi nəzərdə tutulur.

Qeyd edək ki, BMT-nin 5 regional komissiyalarından biri olan Avropa İqtisadi Komissiyası (UNECE) 1947-ci ildə yaradılıb. Öz sıralarında Avropanın 56 ölkəsini birləşdirən təşkilatın əsas məqsədi Avropada iqtisadi inteqrasiya proseslərinin sürətləndirilməsindən ibarətdir. Komissiyanın fəaliyyətində 70-dən artıq beynəlxalq təşkilat iştirak edir. UNECE regionda və onun xaricində beynəlxalq əməkdaşlığın inkişaf etdirilməsi məqsədilə müvafiq sahələr üzrə beynəlxalq konfransların keçirilməsini dəstəkləyir.

Mərkəzi Asiyada regional əməkdaşlığın gücləndirilməsi və region ölkələrinin dünya iqtisadiyyatına inteqrasiya olunması məqsədilə 1998-ci ildə təsis edilən SPECA BMT tərəfindən yaradılmış xüsusi bir qurumdur. Azərbaycan, Əfqanıstan, Qazaxıstan, Qırğızıstan, Tacikistan, Türkmənistan və Özbəkistan SPECA-nın üzv ölkələridir. Azərbaycan eyni zamanda SPECA-nın içi qrupunda aparıcı ölkələrdən biridir. SPECA-nın ölkələr üzrə fəaliyyəti xüsusi olaraq BMT-nin Avropa üzrə İqtisadi Komissiyası (UNECE) və Asiya və Sait Okean hövzəsi ölkələri üçün İqtisadi və Sosial Komissiyası (UNESCAP) tərəfindən tənzimlənir.