İnfrastruktur

Ana səhifə

İnfrastruktur

İordaniya Ali Təhsil və Elmi Tədqiqatlar Nazirliyinin baş katibi Azərbaycanın Rabitə və Informasiya Texnologiyaları Nazirliyində olub

25 noyabr 2011 16:18 (UTC +04:00)

Bakı. Nicat Mustafayev - APA-Economics. Bu gün Azərbaycanın rabitə və informasiya texnologiyaları naziri Əli Abbasov Bakıda səfərdə olan İordaniya Ali Təhsil və Elmi Tədqiqatlar Nazirliyinin baş katibi Mustafa əl-Udvan ilə görüşüb.

Nazirlikdən «APA-Economics»ə verilən məlumata görə, görüşdə son illər Azərbaycanda həyata keçirilən genişmiqyaslı islahatlar, əldə olunan yüksək nəticələr barədə qonağa ətraflı məlumat verilib. Ölkədə rabitə və informasiya-kommunikasiya texnologiyaları sektorunda həyata keçirilən tədbirlərdən danışan Ə.Abbasov İordaniya ilə informasiya texnologiyaları sahəsində mövcud olan əməkdaşlıq əlaqələrini yüksək qiymətləndirib.

Eyni zamanda 2009-cu ildə Azərbaycan Rabitə və İnformasiya Texnologiyaları Nazirliyi ilə İordaniya Haşimilər Krallığının İnformasiya Kommunikasiya Texnologiyaları Nazirliyi arasında informasiya texnologiyaları sahəsində imzalanan Memorandumu xatırladan nazir bu sənəd çərçivəsində yaradılan İşçi Qrupunun əməkdaşlıq əlaqələrinin genişləndirilməsi üçün səylə çalışdığını qeyd edib. Ə.Abbasov 2012-ci ildə İşçi Qrupunun iclasının keçiriləcəyini və bir sıra məsələlərin ətraflı müzakirə olunacağını vurğulayıb.

Nazir Azərbaycanda aparılan təhsil islahatları fonunda İKT-nin rolunun artırılması baxımından bu sahədə böyük təcrübəyə malik İordaniya ilə əməkdaşlığın böyük əhəmiyyət kəsb edəcəyini bildirib.

Öz növbəsində M.Udvan Azərbaycanda İKT sahəsində əldə olunmuş nailiyyətlər, iş şəraiti və investisiya şəraiti ilə tanış olduqlarını deyib, həmçinin gələcəkdə Azərbaycanla İordaniya arasında rabitə və informasiya texnologiyaları sahəsində hökumətlərarası sazişin imzalanmasını labüd hesab edib. İordaniyalı nazir İKT sahəsində yeni kadrların hazırlanması ilə bağlı Azərbaycanla təcrübə mübadiləsinin aparılmasına hazır olduqlarını bildirərək iordaniyalı iş adamlarının sektor üzrə həyata keçirilən işlərə təşviq olunmasının mümkünlüyünü vurğulayıb.