İnfrastruktur

Ana səhifə

İnfrastruktur

Azərbaycanın rabitə və informasiya texnologiyaları naziri Pakistanın elm və texnologiya üzrə federal naziri ilə görüşüb

26 noyabr 2011 10:40 (UTC +04:00)

Bakı. Nicat Mustafayev – APA-Economics. Azərbaycanın rabitə və informasiya texnologiyaları naziri Əli Abbasov Bakıda səfərdə olan Pakistanın elm və texnologiya üzrə federal naziri Çenqez Xan Camali ilə görüşüb.

Nazirlikdən «APA-Economics»ə verilən məlumata görə, Azərbaycanla Pakistan arasında əməkdaşlıq əlaqələrinin 2005-ci ildə İKT sahəsində əməkdaşlıq haqqında hökumətlərarası sazişlə daha da genişləndiyini bildirən Ə. Abbasov Pakistanla informasiya texnologiyaları üzrə yeni kadrların hazırlanması, yerli mütəxəssislərə təlimlərin keçirilməsi istiqamətində təcrübə mübadiləsinin aparıldığını qeyd edib.

Daha sıx əməkdaşlıq üçün qarşılıqlı səfərlərin təşkilini yüksək qiymətləndirən nazir, Azərbaycan və Pakistanın müvafiq birlik və müəssisələri arasında yaradılan İşçi Qrupunun fəaliyyətinin genişləndirilməsinin qarşılıqlı əlaqələrin inkişafı baxımından faydalı olacağını bildirib.

Öz növbəsində, Ç.X.Camali Azərbaycanla bütün sahələrdə sıx dostluq əlaqələrinin olduğunu qeyd edərək, İKT sektorunda bundan sonra da əməkdaşlıq münasibətlərinin genişləndirilməsini məqsədəuyğun sayıb və bildirib ki, bu sahədə səmərəli əməkdaşlıq üçün aidiyyəti nazirliklər arasında təcrübə mübadiləsinin və müzakirələrinin intensivləşdirilməsi zəruridir.