İnfrastruktur

Ana səhifə

İnfrastruktur

«Bakcell» və «Opera Software» şirkətləri «Opera Mini» brauzerini təqdim edib

01 dekabr 2011 10:49 (UTC +04:00)

Bakı. Nicat Mustafayev - APA-Economics. Azərbaycanın ilk mobil rabitə operatoru olan «Bakcell» şirkəti dünyanın ən populyar mobil internet brauzeri olan «Opera Mini» proqramının yaradıcısı «Opera Software» şirkəti ilə əməkdaşlığa başlayıb.

«APA-Economics»in məlumatına görə, «Opera Mini» brauzerinin təqdimatına dair keçirilən tədbirdə «Bakcell» şirkətinin prezidenti Riçard Şirer qeyd edib ki, «Opera Mini» mobil internet şəbəkəsində ən yaxşı brauzer hesab olunur və hazırda dünyada mobil telefon vasitəsilə bu brauzerdən istifadə edənlərin sayı 140 mln. nəfərdir. İki şirkətin yeni əməkdaşlığından danışan R.Şirer, həmçinin bildirib ki, əməkdaşlıq çərçivəsində «Opera Software» şirkəti «Bakcell» abunəçilərinə mobil telefon vasitəsilə internetdən daha sürətli və rahat istifadəni təklif edən «Opera Mini» brauzerinin xüsusi versiyasını hazırlayır: «Sözügedən brauzerdən istifadə zamanı internet səhifələri digər mobil brauzerlərlə müqayisədə daha tez yüklənir. Xüsusi olaraq mobil telefonlar üçün hazırlanmış «Opera Mini» brauzeri veb-səhifələrini sıxmaqla məlumat axınını 90%-dək azaldır və yüksəksürətli internetdən istifadə zamanı pula qənaət etmək imkanını yaradır».

Qeyd edək ki, «Bakcell» şirkəti «Opera Mini» istifadəçilərinə 0,19 manat qiymətinə bir günlük və ya 1,99 manat qiymətinə aylıq limitsiz internet paketlərini təklif edir. Abunəçilər mobil teleonlardan m.opera.com ünvanına daxil olub «Opera Mini» brauzerlərini yükləyə bilər. Xidmət «Blackberry» istifadəçiləri istisna olmaqla, bütün «Bakcell» abunəçiləri üçün nəzərdə tutulub. Müştərilər paketi seçmək üçün «1» və ya «30» kodunu 6464 nömrəsinə SMS vasitəsilə göndərməlidir. Ümumiyyətlə, «Opera Mini» brauzeri 3 mindən artıq mobil telefon modeli və ən populyar mobil platformalar tərəfindən dəstəklənir.