İnfrastruktur

Ana səhifə

İnfrastruktur

Azərbaycanda internet istifadəçilərinin 20%-i «dial-up» xidmətindən yararlanır

05 dekabr 2011 11:39 (UTC +04:00)

Bakı. Nicat Mustafayev – APA-Economics. Azərbaycanda «dial-up» internet xidmətlərinin bazardakı payı getdikcə azalacaq. «APA-Economics»in məlumatına görə, bunu Azərbaycan Rabitə və İnformasiya Texnologiyaları Nazirliyi informasiya cəmiyyətinin inkişafı şöbəsinin müdiri İsfəndiyar Əliyev bildirib.

Onun sözlərinə görə, hazırda ölkədə sürətli internetin inkişafı, o cümlədən şəbəkənin geniş yayımı üçün müvafiq tədbirlər həyata keçirilir: «Hazırda Azərbaycan əhalisinin 60%-i internet istifadəçisidir ki, bunun da 30%-i sürətli internetdən istifadə edir. Bakıda internet istifadəçilərinin yalnız 20%-i «dial-up» internet xidmətlərindən yararlanır ki, getdikcə bu göstərici azalacaq. Belə ki, artıq bir çox internet-provayder şirkətləri sözügedən xidmətləri dayandırıb və yalnız sürətli internet xidmətləri təklif edir. Regionlarda «dial-up» internet xidmətinin istifadəçilərinin sayı paytaxtdakından bir qədər çox olsa da, düşünürəm ki, bu xidmətdən bölgələrdə yararlananların sayı müəyyən vaxtdan sonra azalacaq».

Nazirlik rəsmisi onu da bildirib ki, Beynəlxalq Telekommunikasiya İttifaqının (ITU) proqnozlarına əsasən, yaxın 3-4 ildən sonra dünya əhalisinin 40%-i sürətli internetdən istifadə edəcək: «Azərbaycanda 3G-nin tətbiqi və 4G xidmətinin tətbiqinə hazırlıq işləri, həmçinin sürətli internet xidmətlərinin inkişafı istiqamətində görülən işlər sürətli internet istifadəçilərinin sayına görə orta dünya göstəricisindən yuxarı olacaq».