İnfrastruktur

Ana səhifə

İnfrastruktur

Bakıda avtobus marşrutlarının sayı 310-dan 217-yə endirilib

06 dekabr 2011 10:26 (UTC +04:00)

Bakı. Əli Əhmədov - APA-Economics. Bakı şəhəri daxilində avtobuslarla sərnişin daşınması üçün istismar olunan marşrutların sayı 310-dan 217-ə endirilib. Bu barədə «APA-Economics»ə Nəqliyyat Nazirliyinin mətbuat xidmətinin rəhbəri Namiq Həsənov məlumat verib.

Onun sözlərinə görə, bunlar əsasən bir-birini təkrarlayan və eyni xətlə hərəkət edən marşrutlardır: “Marşrutların sayının azaldılması şəhərdə tıxacların və gərginliyin azaldılması məqsədi daşıyır. Elə küçələr vardı ki, orda 40-a yaxın marşrut işləyirdi”.

Nazirlik nümayəndəsi bildirib ki, eyni istiqamətdə hərəkət edən marşrutlarda fəaliyyətini davam etdirəcək şirkətlər göstərdikləri xidmətlərin səviyyəsinə görə seçilir: “Təkrar istiqamətlərdə “Bakısərnişinnəqliyyat” vasitəsilə monitorinqlər aparılır və hansı şirkət daha yaxşı xidmət göstərirsə, işini davam etdirir. Bununla bağlı müsabiqələrin elan olunması nəzərdə tutulmayıb”.

Xatırladaq ki, Nazirlər Kabinetinin qərarına əsasən sərnişin daşınması marşrutları üzrə fəaliyyət göstərəcək şirkətlər müsabiqə ilə seçilməlidir. N.Həsənovun sözlərinə görə, şirkətlərin göstərdiyi xidmətlərin səviyyəsi «göz qabağında olduğu üçün müsabiqənin keçirilməsinə ehtiyac da yoxdur. Üstəlik, bəzi şirkətlərin özləri nazirliyə müraciət edərək fəaliyyətlərini dayandırdıqlarını bildirirlər».

Nazirlik nümayəndəsinin fikrincə, marşrutların azalması paytaxtda avtobusların sayını azaltmayacaq, çünki xətlərdən çıxan avtobuslar digər xətlərə yönəldiləcək. Üstəlik, yaxın vaxtlarda şəhərə daha 200 yeni iri tutumlu avtobuslar gətiriləcək. Hazırda isə Bakıda 1300-ə qədər iri, 1000-dən artıq orta tutumlu, 550-yə yaxın kiçik avtobuslar istismar olunur.