İnfrastruktur

Ana səhifə

İnfrastruktur

Olli Noroyono: «Azərbaycan nəqliyyat sahəsində logistika və sərhəd keçidinə fikir verməlidir»

07 dekabr 2011 09:09 (UTC +04:00)

Bakı. Nicat Mustafayev - APA-Economics. Asiya İnkişaf Bankı (AİB) Azərbaycanın nəqliyyat sektorunda daha fəal iştirak etməyə başlayıb. «APA-Economics»in xəbərinə görə, bunu AİB-in Azərbaycan nümayəndəliyinin rəhbəri Olli Noroyono bildirib.

Onun sözlərinə görə, Asiyada hər 5-7 ildən bir avtonəqliyyat vasitələrinin sayı 2 dəfə artır: «ÜDM-in adambaşına düşən payı 5000 dollar təşkil edən region ölkələrində hər 1 min nəfərə 100 avtomobil düşür. Azərbaycanda isə ÜDM-in adambaşına düşən payı 6000 dollar təşkil etdiyindən, burada bu göstərici daha da yüksəkdir. Ötən ilin göstəricisinə görə, Azərbaycanda hər 1 min nəfərə 110 avtomobil düşür».

O.Noroyono qeyd edib ki, AİB nəqliyyat sektoruna, o cümlədən dəmir yolu sahəsinə gələcəkdə diqqətini artıracaq: «Təqdirəlayiq haldır ki, ölkədə ictimai nəqliyyatın inkişafına dövlətin dəstəyi böyükdür». Bakı şəhərində Nəqliyyatın İntellektual İdarəetmə Sistemini yüksək qiymətləndirən AİB rəsmisi bildirib ki, Azərbaycan bu işləri davam etdirməli, yeraltı dayanacaqlar və piyada keçidləri tikməlidir: «Ümumiyyətlə, Azərbaycan nəqliyyat sahəsində logistika və sərhəd keçidinə fikir verməlidir ki, yubanmalar daha da azalsın. Eyni zamanda, tikilən liman bu sahədə vəziyyəti daha da yaxşılaşdıracaq».