İnfrastruktur

Ana səhifə

İnfrastruktur

Mingəçevirdə “Mənzil fondunun idarə olunmasının yeni metodlarının tətbiqi” mövzusunda tədbir keçirilib

31 yanvar 2012 11:30 (UTC +04:00)

Mingəçevir. Elvin Yaqubov - APA. İqtisadi İnkişaf Nazirliyinin (İİN) təşkilatçılığı ilə yanvarın 31-də Mingəçevirdə “Mənzil fondunun idarə olunmasının yeni metodlarının tətbiqi” mövzusunda tədbir keçirilib.

APA-nın məlumatına görə, İİN-in və Aran iqtisadi rayonuna daxil olan 18 şəhər və rayonun icra hakimiyyəti başçılarının sosial-iqtisadi məsələlər üzrə müavinləri, bələdiyyə sədrləri iştirak etdiyi tədbirdə iqtisadi inkişaf nazirinin müavini Sevinc Həsənova, Mingəçevir şəhər İcra Hakimiyyətinin başçısı Mübariz Ağayev çıxış edib.

Bildirilib ki, mənzil-kommunal sahəsinin yeni qanunvericiliyin tələblərinə uyğun olaraq idarə olunmasına keçidlə əlaqədar bu sahədə aparılacaq islahatların əlaqələndirilməsi, əhalinin səmərəli sosial müdafiə mexanizminin yaradılması istiqamətində İİN tərəfindən bir sıra zəruri tədbirlər görülməkdədir. Bu sahədə əsas yeniliklərdən biri bazar iqtisadiyyatı prinsiplərinə uyğun olaraq mənzil fondunun idarə olunmasının yeni metodlarının tətbiqidir.

S.Həsənova qarşıya qoyulan məqsədlərə nail olunmasının səmərəli mexanizminin yaradılması məqsədilə icra və bələdiyyə qurumları ilə birlikdə genişmiqyaslı maarifləndirmə və təbliğat işlərinin aparılması, ictimaiyyətin yeni Mənzil Məcəlləsi və onun üstünlükləri, həmçinin bu sahədə digər məsələlər barədə məlumatlandırılmasının vacibliyini qeyd edib.

Tədbirdə İİN-in Mənzil-kommunal siyasəti şöbəsinin müdiri Nizami Qasımov mənzil-kommunal təsərrüfatının inkişaf perspektivləri, şöbənin müdir müavini Elşən Əsədov Mənzil Məcəlləsində nəzərdə tutulan yeni idarəetmə formalarının tətbiqinin əhəmiyyəti və üstünlükləri, İqtisadi İslahatlar Elmi-Tədqiqat İnstitutunun direktoru Vilayət Vəliyev mənzil fondunun yeni idarəetmə formalarının yaranması və inkişafında beynəlxalq təcrübə mövzularında çıxış etmiş, tədbir iştirakçılarının suallarını cavablandırıb.

Sonda tədbir iştirakçılarına “Mənzil fondunun yeni idarəetmə üsullarına dair sənədlər toplusu” paylanılıb.