İnfrastruktur

Ana səhifə

İnfrastruktur

Azərbaycan gömrükçüləri 1,3 kq qızıl-zinət əşyalarının qanunsuz idxalının qarşısını alıblar

25 fevral 2012 11:13 (UTC +04:00)

Bakı. Əli Əhmədov – APA-Economics. Dövlət Gömrük Komitəsinin (DGK) əməkdaşları Azərbaycana qanunsuz yolla zərgərlik məmulatlarının gətirilməsinin qarşısını alıblar.

DGK-dən «APA-Economics»ə verilən məlumata görə, İstanbul-Bakı aviareysi ilə gələn Azərbaycan vətəndaşı Zaur İsmayılov gömrük nəzarətindən «yaşıl kanalla» keçərkən, Hava Nəqliyyatında Baş Gömrük İdarəsinin əməkdaşı tərəfindən saxlanılıb. Həmin vətəndaş gömrük bəyannaməsini təqdim etməyib və mütləq bəyan olunan malların olmadığını bildirdikdən sonra, onun əl çantasına və baqajına «Rapiscan-628» markalı X-Ray aparatı ilə baxış keçirilib. Əl çantasına baxış zamanı aparatın monitorunda zərgərlik məmulatına bənzər əşyaların təsvirləri əks olunub və bu səbəbdən çantaya təkrar gömrük baxışı keçirilib. «Nəticədə, həmin çantadan sellofanlara bükülmüş 3 ədəd qutudan müxtəlif daşlarla bəzədilmiş qızıl-zinət əşyaları - 35 ədəd boyunbağı, 58 ədəd qolbaq, 89 cüt sırğa, 85 ədəd üzük, 124 ədəd kulon və 60 ədəd zəncir boyunbağı aşkar edilib və protokol əsasında götürülüb. Ekspert arayışına görə, həmin zərgərlik məmulatlarının ümumi çəkisi 1 269,3 qram təşkil edib», - deyə məlumatda bildirilir.

Digər qanunsuz idxal cəhdi isə Sankt-Peterburq-Bakı aviareysində qeydə alınıb. Komitənin məlumatına görə, Azərbaycan vətəndaşı Camal Əliyev Sankt-Peterburq-Bakı aviareysi ilə göndərilən və müşayiət olunmayan baqajı qəbul edib gömrük nəzarətindən «yaşıl kanalla» keçərkən, Hava Nəqliyyatında Baş Gömrük İdarəsinin əməkdaşları tərəfindən saxlanılıb. C.Əliyev qəbul etdiyi baqajda şəxsi əşyaların və az miqdarda parfümeriyanın olduğunu bildirsə də, həmin əşyalara «Rapiscan-628» markalı X-Ray aparatı ilə baxış zamanı 2 ədəd irihəcmli çantadan 16 adda 408 ədəd müxtəlif çeşidli parfümeriya və kosmetika malları aşkar edilərək protokol əsasında götürülüb. «Maraqlıdır ki, adıçəkilən vətəndaş gömrük nəzarətindən keçərkən həmin malları şifahi və ya yazılı formada bəyan etməməsinin səbəbini ilk dəfə gömrük sərhədindən kommersiya məqsədli mallar aparması ilə izah edib», - deyə məlumatda bildirilir.

Bütün faktlarla bağlı təhqiqat aparılır.